“Оюу толгой” 2024 оны I улирлын тайлангаа танилцууллаа.  Гүний уурхайн олборлолт эхэлсний нэг жилийн ой энэ оны гуравдугаар  сарын 13-ны өдөр боллоо. Гүний уурхайн агааржуулалтын босоо ам IV нэвтрэлтийг амжилттай дуусгасан. Дэлхийн усны өдрийн амжилттай зохион байгуулсан.

Түүнчлэн Хөдөлмөр, нийгмийн хамгааллын сайдын 2022 оны гуравдугаар сарын 17-ны өдрийн А/49 дугаар тушаалаар "Дундаж цалин хөлс тодорхойлох журам"-ын нэмэлтийг (Журмын нэмэлт)-ийг хэрэгжүүлж байгаатай холбогдуулан ажилтнуудаас гарсан санал, шаардлагын дагуу “Оюу толгой” ХХК болон “Оюу толгой” ХХК-ийн Уул уурхайн ажилтны үйлдвэрчний эвлэлийн хороо (ҮЭХ)-ны төлөөллөөс бүрдсэн Хамтарсан ажлын хэсэг байгуулагдан ажиллаж, 20 гаруй удаагийн уулзалт зохион байгуулан, нийт ажилтан, тэдний гэр бүлийн эрүүл мэнд, сайн сайхан байдалд чиглэсэн хамтын тохиролцоонд хүрч чаджээ. “Оюу толгой” компани мэдээллийн ил тод байдлыг хангах хүрээнд дөрөвдүгээр сарын 19-ний өдөр үндэсний хэмжээний томоохон иргэний нийгмийн байгууллагуудын удирдлага болон төлөөллийг уурхайн цогцолбортоо хүлээн авч уулзсан байна. Энэ үеэр уурхайн үйл ажиллагаа болон байгаль хамгааллын чиглэлээр хийж буй санаачилга, ажлуудын талаар нээлттэй хэлэлцүүлгийг өрнүүлж, ил тод санал солилцлоо. Цаашид тогтмол уулзалт зохион байгуулах ажээ. 

Гүний уурхайн олборлолтын хэмжээг нэмэгдүүлэх зорилгын хүрээнд энэ улиралд 13 хүдэр бутлуурыг тэсэллээ. Улмаар Панел 0 олборлолтын түвшинг нийт хүдэр буулгуурын тоо 99 боллоо. Тус хамт олон 2028-2036 оны хооронд нэг жилд олборлох зэсийн хэмжээг дунджаар 500 мянган тоннд хүргэх бизнесийн зорилтод хүрэхийн алхам алхмаар урагшилсаар байгаа гэлээ.

2024 оны нэгдүгээр улиралд  629 тэрбум төгрөг буюу 185 сая ам долларыг татвар, хураамж хэлбэрээр улсын төсөвт төвлөрүүлжээ. I улиралд 693 ханган нийлүүлэгчтэй хамтран ажилласнаас 538 нь дотоодын ханган нийлүүлэгч байв. Үйл ажиллагааны худалдан авалтынхаа 89 хувийг эдгээр үндэсний ханган нийлүүлэгчдэдээ  зарцуулжээ. Гүний уурхайн олборлолт нэмэгдсээр байна. Ингэснээр зэсийн үйлдвэрлэл 2024 оны эхний улиралд найман хувиар өссөн байна. Гүний уурхайгаас 1.67 хувийн зэсийн дундаж агуулгатай 1.3 сая тонн хүдэр, ил уурхайгаас 0.39 хувийн зэсийн дундаж агуулгатай 9.0 сая тонн хүдэр тус тус олборложээ.

Гүний уурхай амын босоо нэвтрэлтийг ахиулж, гуравдугаар сарын эцсийн байдлаар агааржуулалтын урд болон хойд амын нэвтрэлтийг 1.076 болон 1.150 метрт хүргэжээ. Мөн агааржуулалтын урд болон хойд амын нэвтрэлтийг 1.130 болон 1.176 метрт хүргэх төлөвлөгөөтэй ажиллаж байна. Гүний уурхайн агааржуулалтын Босоо ам 4-ийн нэвтрэлтийн барилгын ажлыг энэ сард амжилттайгаар дуусгалаа. Дээрх хоёр босоо амыг 2024 оны II хагаст ашиглалтад хүлээлгэн өгөх төлөвтэй байна. Гүний уурхайн амын  босоо нэвтрэлтийг гүйцээн дуусгахад ойртож байгаа ажээ.

Эх сурвалж: “Зууны мэдээ” сонин 2024 ОНЫ ДӨРӨВДҮГЭЭР САРЫН 29. ДАВАА ГАРАГ.