Баасан гарагийн өглөө эрт Оросын Белгород хотод оршдог Роснефть компанийн газрын тосны нөөцийн байгууламж галд автжээ.

Белгород хот нь Украины хойд хилээс 40 км зайтай, бүслэлтэд байгаа Харьков хотоос холгүй оршдог. Тус хотын захирагч Вячеслав Гладков уг осолд Украины талыг буруутгасан байна.

Түүний хэлснээр бол Москвагийн цагаар өглөөний 5:00 цагийн орчимд Украины хоёр Ми-24 нисдэг тэрэг Оросын агаарын орон зайд маш нам өндөртэй нисэж орж ирээд Белгородын захад оршдог байгууламжууд руу гал нээсэн гэнэ.

Нөөцийн байгууламжууд нь Оросын армитай ямар ч холбоогүй, зөвхөн иргэний зориулалттай болохыг Гладков мэдэгджээ.

Халдлагын үеэр хүний амь үрэгдээгүйг тэр баталсан байна. Газрын тосны нөөцийн нийт найман том сав галд шатжээ.

Кремлийн хэвлэлийн төлөөлөгч Дмитрий Песков уг явдлыг Орос-Украины хооронд одоо үргэлжилж буй энхийн яриа хэлэлцээнд сайнаар нөлөөлөхгүйг анхааруулсан байна.

Харин Украины батлан хамгаалах яам Оросын эзлэн түрэмгийллийг эсэргүүцэх байлдааны ажиллагаа зөвхөн Украины газар нутагт явагдаж байгааг мэдэгдээд Белгородод халдлага үйлдсэн гэх мэдээллийг няцаажээ.

“Оросын нутаг дэвсгэрт гарч буй бүх осол эндэгдэлд Украиныг буруутгах ёсгүй. Ийм гүтгэлэг анх удаа гарч байгаа юм биш” гэж Украины батлан хамгаалах яамны хэвлэлийн төлөөлөгч Олександр Мотузяник ярьсан байна.

Украины албаны зарим эх сурвалж уг ослыг Оросын талын хариуцлагагүй байдалтай холбоотой, эсвэл хэн нэгэн авлигын хэргээ нуун дарагдуулах гэж зориуд гал тавьсан байж болзошгүй гэжээ.

Хэрвээ Украины тал үнэхээр халдлага үйлдсэн бол энэ нь Оросын агаарын хамгаалалт сул байгааг харуулсан явдал болж байна.

Оросын төв телевизийн хөтлөгч, Кремлийн гол суртал нэвтрүүлэгчдийн нэг гэгддэг Владимир Соловьев “Асуулт. Белгородын бүс нутгийг агаараас хамгаалах ажлыг хэн хариуцдаг вэ? Халдлага үйлдсэн нисдэг тэрэгнүүдийг устгасан уу? Белгород орчмын хамгаалалтын бүсийг хэзээ байгуулах вэ?” гэж твиттер хуудсандаа бичжээ.