Сүүлийн хэдэн хоног даатгалын тухай хуулийн төсөл хэлэлцэгдээд иргэд ихээхэн анхаарч, үзэл бодлоо илэрхийлж байгаа харагдлаа. Манайхан төгс зүйлийг мөрөөдөөд байх шиг... Нөгөө талаас хувийн компани болохоор нь шулж байна, мөлжиж байна гэдэг яриа их анзаарагдах юм. Товчхондоо ийм хэдэн бодол төрж байна:

1. Даатгалын нөхөн олговор олгох дээр асуудал байгаа бол хуулийн тэр хэсгээ сайжруулаад, журмыг нь илүү тодорхой болгох хэрэгтэй

2. Таны даатгуулсан компани хүнд сурталтай, үйлчилгээ муутай байвал дараа жил нь даатгалаа л сольчих (надад Номингийн үйлчилгээ таалагдаагүй болохоор нь Тэнгэр даатгал руу шилжсэн)

3. Төрд очлоо гээд энэ санаачлагч гишүүдийнх нь яриад байгаа шиг бүх юм өргөс авсан юм шиг сайжрахгүй ээ. Осол буурахгүй ээ, хүнд суртал багасахгүй ээ, илүү их нөхөн төлбөр өгдөг болохгүй л гэж айж байна

4. Алдаа дутагдалтай салбар бүрийг төр өөр дээрээ аваад байвал хувьд юу үлдэх вэ? Хүмүүс дата авахаар хурдан дуусаад байна гээд байвал төр оператор хийх үү? Банк шулаад байна л гээд байдаг, Төрийн банктай болсон юу өөрчлөгдсөн бэ? Төрийн банкны үйлчилгээ нь бусдаасаа илүү юу?

5. Гишүүд даатгалын компаниудын орлогоос шууд нөхөн төлбөрийн дүнг хасаад ашиг гэж яриад суухаасаа ичих хэрэгтэй. Тэр үйл ажиллагааг явуулахад шаардлагатай асар олон зардлыг, бизнесээ босгоход орсон хөрөнгө оруулалтыг мартаж болохгүй.

6. Даатгалын үнийн талаар бол нээлттэй ярилцаж болно гэж бодож байна. Гэхдээ осол хийхгүй бол мөнгө буцааж авна гэдэг бол худлаа. Учир нь даатгалын бүх систем олон хүн тус бүрээс бага мөнгө цуглуулаад, арай цөөн тооны гэхдээ нэгж дүн нь өндөр хохиролыг нөхөн төлдөг энгийн тогтолцоо. Жишээ нь: 50к-р даатгууллаа, осол гаргавал 400к-ийн нөхөн төлбөр авлаа.

7. Тогтвортой болгох гэж олон жил зүтгэж, олон хүнд хараалгуулан байж босгосон бэлэн бизнесийг төр булаах гэж байгаа юм шиг л харагдаж байна. Анхнаасаа төр өөрөө ийм даатгалын төлбөр авна гэсэн бол хүмүүс боож үхэх гээд тэр төсөл нь унах байсан байх. Зарим поп гишүүд нь ард иргэдийг шулах гэлээ, ачаа дарамтыг нь нэмж байна гэж чанга дуугарах байсан биз. Одоо жилийн эргэлт нь тодорхой болж, хүмүүс төлөөд дассан хойно төр нь хувийн хэвшил рүүгээ нулимаад, ирээдүйг нь шаварт хутгаад хаях гэж байна. Энэ шийдвэрийн ард олон хүний ажлын байр (5,000), бизнесийн төлөвлөгөө, ХК-ийн хувьцааг хөрөнгийн бирж дээрээс авсан хөрөнгө оруулагч (20,000) иргэдийн итгэл, бүхэл бүтэн салбарын тогтвортой байдал эрдэлд орж магадгүй байна.

Энэ хууль нь ерөнхийдөө хувийн хэвшил ашигтай ажиллаж болохгүй, ашигтай ажиллаад их мөнгө эргэлдэх юм бол төрд авсан нь зөв гэдэг үзэл санааг дэмжээд байх шиг . Уг нь би чинь хувийн бизнесийг (ашиг олохыг) хүлээн зөвшөөрдөг улсад амьдраад байгаа гэж бодоод байгаа. Сайн хөлсөө гаргаж хөдөлмөрлөвөл сайхан амьдарна гэж итгээд яваа. Яг цагаа тулсан чинь арай өөр болоод явчихав уу даа? Төр нь ч тэр, бидний байгаа нь ч тэр

Алдаатай байна гээд булааж болохгүй, харин хууль журмаа байнга тордож сайжруулж байх хэрэгтэй гэж бодож байна.

Нуухыг нь авах гээд нүдийг нь сохлож болохгүй...