УИХ-ын намрын ээлжит чуулган хуулийн дагуу 10 дугаар сарын 1-нд эхэлнэ. Гэвч сүүлийн өдрүүдэд ээлжит бус чуулганы чимээ чих дэлсэх болов. Гэхдээ УИХ-ын тамгын газрын хэвлэл, мэдээлэл олон нийттэй харилцах хэлтсээс "Ээлжит бус чуулган хуралдуулах эсэх нь тодорхойгүй байна" гэх мэдээллийг өгчээ.
Үнэхээр ч тус хэлтэст одоохондоо мэдээлэх болоогүй аж. Уг нь Ковид-19 цар тахалтай холбоотойгоор Засгийн газар УИХ-аар хэлэлцүүлэх бишгүй хуулийн төслүүд овоорчээ. Гэхдээ л УИХ-ын ээлжит чуулганыг зарлах болоогүй. Учир нь, Засгийн газар, УИХ-ын үйл ажиллагааны зэрэгцээ эрх баригч МАН-ын дотоод зодооны асуудал цэгцрэх ёстой.
Тиймээс ч хуралдаан нь завсарлаж, орон нутгийг зорьсон гишүүд бүсийн морин уралдаан, Сутай хайрханы тахилга зэрэгт оролцжээ. Мэдээж тэд амарч, зугаалахаас илүү намын дотоод асуудлаа холхон очиж тохиролцож яваа сурагтай.
Тэрхүү тохиролцооны гол “уяач” нь МАН-ын дарга, Ерөнхий сайд Л.Оюун-Эрдэнэ. Намын гишүүд нь “УИХ-ын нөхөн сонгуулийн бэлтгэл ажил хангагдчихаад байхад Засгийн газар нь чинь ялалтын буухиаг таслах нь, зарим сайдаа явуул, соль” гэдэг шаардлагыг тавих болжээ.
Бараг л тэгсэн цагт УИХ-ын ээлжит бус хуралдааныг зарлана гэдэг асуудлаар бойкотлоод байгаа аж. Тиймээс Ерөнхий сайд Л.Оюун-Эрдэнэ өөртөө бүх булууг үүрч байхаар нэр бүхий хүмүүсээ үдэх тухай яриа гаргажээ.
Тухайлбал, Зам тээврийн хөгжлийн сайд Л.Халтар, Соёлын сайд Ч.Номин, БОАЖ-ын сайд Н.Уртнасан, Уул, уурхайн сайд Г.Ёндон, Эрүүл мэндийн сайд С.Энхболд нарыг солих гэнэ.
Тэднийг Засгийн газрын гишүүнээр тодорхой хугацаанд ажиллуулсан. Харамсалтай нь, өнөө цагийн хамгийн чадамжгүй Засгийн газар гэдэг нэр зүүхэд хүргэсэн хэмээн МАН-ын лухгарууд бухимдах болж. Мөн дээрх нөхөдтэй хамт Хууль зүй, дотоод хэргийн сайд Х.Нямбаатарыг ч явуулах санал МАН-ын томчуудын дунд гарсан ч Л.Оюун-Эрдэнэ улаан нүүрээ минчигнүүлэн үлдээхээр чичирчээ.
Ийн МАН дотоод асуудлаа цэгцлэх гэж дунших явахад хичээлийн шинэ жил эхэлж, нийслэл болон аймгийн төвүүдэд хүний бөөгнөрөл үүсч, цар тахлыг халдвар, тархалт ч нэмэгдэх магадлалтай. Тэр үед нь Засгийн газарт ирэх дайралтыг нэр бүхий сайд нарт нялзаагаад, кабинетдаа салхи оруулах аж. Харин түүний дараа буюу есдүгээр сарын дунд үед УИХ-ын ээлжит бус хуралдааны талаар тохиролцохоор болжээ.
