Монгол Улсын Ерөнхийлөгчийн сонгуульд МАН-аас нэр дэвшигч У.Хүрэлсүх 69 хувийн саналаар ялалт байгуулсан. Ингэснээр УИХ-ын сонгуулийн 18 дугаар тойрог буюу Хэнтий аймагт нөхөн сонгууль явагдах нь тодорхой болсон.
Улс төрийн нам, эвслүүд хэн гэдэг нэр дэвшигчийг сойж, хэн гэдэг аавын хүү Ерөнхийлөгчийн УИХ-ын гишүүний суудлыг орлож гарч ирэх бол гэсэн таамаг энэ жилийн наадмын бөхийн таавраас илүү олны анхаарлыг татаж байна. МАН-аас нэр дэвшихээр горилогчдын дунд ч ширүүхэн өрсөлдөөн болж нэр дэвшигч, горилогч нар эхнээсээ тодорч байгаа бололтой. Ерөнхийлөгч асан Н.Энхбаяр, Соёлын яамны төрийн нарийн бичгийн дарга, гавьяат жүжигчин Г.Эрдэнэбат, хуульч, өмгөөлөгч Л.Батжав нарын нэрс хүчтэй яригджээ.
Эдгээр горилогч нараас нэр дэвших мандат өвөртлөх магадлал өндөртэй нь хуульч Л.Батжав. Өнгөрсөн жилийн УИХ-ын сонгуулиар Хэнтий аймагт рейтинг өндөртэй явсан бие даагчийг МАН-ын лидерүүд, тэр дундаа одоогийн Ерөнхийлөгч У.Хүрэлсүх хэлэлцээрийн ширээнд урьж намдаа элсүүлж чадсаны ард томоохон тохиролцоо байсан нь мэдээж.
Магадгүй нөхөн сонгуульд намаасаа нэр дэвшүүлэх том тохиролцооны хүчээр бие даагчийг намдаа элсүүлсэн байх талтай. Тиймдээ ч өдгөө нэр нь хүчтэй яригдаж буй биз.
Хэнтий нутгийнхан ч "Нутгийн ах нар шахаж, намдаа элсүүлж, нэрийг нь татуулсан тул энэ удаад явуулах нь тодорхой" хэмээн өөр хоорондоо ярилцаж байгаа нь сая болсон Ерөнхийлөгчийн сонгуультай холбоотой. Ерөнхийлөгчийн сонгуульд МАН-аас нэр дэвшигч У.Хүрэлсүх аймаг бүрд итгэлтэй, нэр цэвэр төлөөлөгчөө илгээхэд Хэнтий аймагт хуульч Л.Батжав ажилласан нь 2 талтай.
Намын даргаа ч дэмжиж, өөрөө ч нөхөн сонгуулийн бэлтгэлээ базааж аймгийнхаа бүх сум, тосгоноор орж иргэдтэй уулзсан юм билээ. Завтай, намтайдаа биш өөрийн хүмүүсээ идэвхжүүлж, урьдын тохироо, алсын бодлоо гүйцэлдүүлж явсан байх талтай. МАН-аас нэр дэвшихээр горилогчдыг өнгөлж яваа хуульч Л.Батжав магадлал өндөр байгаа төдийгүй Хэнтийнхэний хүлээлт болж байгаа бололтой.
