Азийн хөгжлийн банкнаас 170 сая ам.долларын зээл авах хуулийг баталлаа
Хуулийн төслийг батлах эсэхээр санал хураалт явуулахад гишүүдийн 89.3 хувь буюу дийлэнх нь дэмжлээ.
“Шуурхай хариу арга хэмжээ авах санхүүжилтийн ерөнхий хөтөлбөрт оруулах нэмэлт, өөрчлөлт”-өөр Азийн хөгжлийн банкнаас манай улс нийтдээ 170 сая ам.долларын хөнгөлөлттэй зээлийн нэмэлт эх үүсвэрийг авч ашиглахаар тохиролцжээ.
170 сая ам.долларын хөнгөлөлттэй зээлийн нэмэлт эх үүсвэрийн 100 сая ам.долларыг төсвийн дэмжлэгт, 70 сая ам.долларыг 2021 оны долоодугаар сар хүртэл хүүхдийн 100 мянган төгрөгийг олгоход, үлдсэнийг нь цар тахлын эсрэг вакцин худалдан авах санхүүжилтэд зарцуулахаар тооцжээ.
Хэлэлцэж буй асуудалтай холбогдуулан гишүүд асуулт асууж, хариулт авч байна.
УИХ-ын гишүүн Н.Алтанхуяг: Ковид гэдэг нэрээр маш их зээл авч байна даа. Дөрөв дэх удаагаа УИХ-д суухдаа ийм танхай Засгийн газар анх удаа харж байна. Хүүхдийн мөнгө нэмнэ гэнэ гэхдээ энэ чинь зээл шүү дээ. Зунаас хойш бид 873 сая ам.долларын шийдвэр гаргаад байна. Ковид нэрийн доор үрэн таран хийж байгаа үр ашиггүй зардлыг хянамаар байна. Ард түмэндээ үнэнг хэлэх хэрэгтэй. Төсвийн мөнгө байхгүй учир гаднаа зээлж авч байгаа гэдгийг нээлттэй хэлэх хэрэгтэй. Өнөөдөр сонгуульд зориулж мөнгө тараадаг тогтолцооноос салмаар байна. Хойч үедээ өр зээл үлдээмээргүй байна.
УИХ-ын гишүүн Д.Ганбат: 170 сая ам.доллар зээлэх гэж байна. Зайлшгүй шаардлагатай авах ёстой зээл гэж үзэж байна уу. Тус зээлийг хэзээ яаж төлөх вэ. Зээлийг хүүхдийн 100 мянга зэрэг халамжид л тараах гэж байна. Уг нь бизнес эрхлэгчдийг дэмжихэд зарцуулмаар байна. Авч байгаа зээлээр халамжийг санхүүжүүлж байгаа нь харамсалтай байна.
Хөдөлмөр, нийгмийн хамгааллын сайд А.Ариунзаяа: Азийн хөжлийн банкны хөнгөлөлттэй зээлийн эргэн төлөгдөх хугацаа нь 25 жил, үүнээс эхний 5 жилд үндсэн төлбөрөөс чөлөөлөгдөх, зээлийн жилийн хүү нь 2 хувь байх бол энгийн эх үүсвэрийн зээлийн эргэн төлөгдөх хугацаа 15 жил, үүнээс эхний 3 жилд үндсэн төлбөрөөс чөлөөлөгдөх бөгөөд зээлийн хүү нь Лондонгийн банк хоорондын зах зээлийн 6 сарын хүү дээр 0.5 хувийн шимтгэл болон хөрөнгийн нөөцийг баталгаажуулсан хураамж болох 0.15 хувийг нэмсэнтэй тэнцүү байх нөхцөлтэй юм.
