Бүгд Найрамдах Франц Улсын Засгийн газар болон Монгол Улсын Засгийн газар хооронд 2015 онд байгуулсан “Сургалтын хамтарсан тэтгэлгийн хөтөлбөр хэрэгжүүлэх тухай хэлэлцээр”-ийн хүрээнд хоёр тал 2016 оноос эхлэн жил бүр Францын их, дээд сургуульд суралцахад зориулан хамтарсан тэтгэлэг олгож ирсэн бөгөөд эдүгээ тавь гаруй монгол оюутан уг хөтөлбөрт хамрагдаад байна.

2021-2022 оны хичээлийн жилд Монгол дахь Францын Элчин сайдын яам болон Монгол Улсын Боловсрол, шинжлэх ухааны яам хамтран Францад франц эсхүл англи хэл дээр 8 магистрийн тэтгэлэг олгох гэж байна. Ингэхдээ хоёр орны харилцаа хамтын ажиллагааны голлох салбаруудын сургалтыг нэн тэргүүнд харгалзаж үзнэ. Үүнд,

1. газар тариалан,
2. мал аж ахуй,
3. хүнс үйлдвэрлэл,
4. хүний болон малын эрүүл мэндийн шинжлэх ухаан,
5. биотехнологи,
6. сэргээгдэх эрчим хүч,
7. геофизик,
8. соёл урлагийн салбар,
9. нанотехнологи,
10. инженерчлэл,
11. хот төлөвлөлт гэх мэт орно.

Тэтгэлгийн талаарх дэлгэрэнгүй мэдээллийг Францын ЭСЯамны www.ambafrance-mn.org болон Боловсрол, шинжлэх ухааны яамны www.meds.gov.mn цахим хуудаснаас авах ба 2021 оны 5 дугаар сарын 31-ний дотор материалаа бүрдүүлэн ирүүлнэ.