Сэтгэл гутралд орсон үед өөрийгөө хэрхэн хайрлах, энэ үеийг хэрхэн давах вэ? Мэргэжлийн сэтгэл засалч, эмчид хандах нь бол ойлгомжтой тул энд дэлгэрүүлж бичсэнгүй.

1. 'Эерэг бай, өөдрөг бай, ажлаа алаад өг...' Иймэрхүү эерэгийн дарамтуудаас өөрийгөө чөлөөлөөрэй, ядаж энэ үедээ. Ажлаа алаад өгөх үе зөндөө л ирнэ, харин энэ үед өөрийгөө хайрлах л чухал. Бүр болохгүй бол сошл сувгууд дээр дагадаг influencer-үүдээ түр unfollow хийчих.

2. Сэтгэл гутралын гол шинж тэмдгүүдийн нэг бол өөрийн сонирхдог зүйлсээ сонирхохоо болих, орноосоо босох хүсэлгүй болох. Энэ үед яаж ийж байгаад босоод, гэрийнхээ нарны гэрэл ордог хэсэгт очоод суух, бүр чадахгүй бол хэвтээрэй. Нарны дулаан элч тайтгаруулдаг.

3. Хичээж байгаад шүршүүрт ороорой. Заавал биеэ угаах гэж хүчлээд хэрэггүй. Зүгээр л халуун бүлээн, хүйтэн хүссэн температуртаа усаа тохируулаад зогсох, чадахгүй бол суугаарай. Ус, усны чимээ тайвшруулна. Усанд утсаа оролдох боломжгүй тул сошлоос үүдэх сөрөг мэдрэмжээс ч өөрийгөө хамгаална.

4. Тав тух хамгийн чухал нь. Аль болох биедээ тухтай, цэвэрхэн хувцас өмсөөрэй.

5. Шингэн зүйл сайн уугаарай. Хэрвээ гэрт нь лимон эсвэл гааны навч байгаа бол усандаа хийж болно. Харин чихэрийн агууламжтай цай, ундаа уугаад дэмий.

6. Хэрвээ босох чадал байгаа бол босоод нүдэнд тороод байгаа жижигхээн цэвэрлэх, цэгцлэх юм байвал цэгцэлчих. Том юм байх албагүй. Ганц нэг халбага угаах, оймсоо хураасан ч болно.

7. Хөгжим сонсох хүсэл төрвөл дуу биш гоё ая сонсоорой. Хэмнэл нь хамаагүй. Харин дуу сонсмоор байвал өөрийн мэддэггүй, ойлгодоггүй хэл дээрээ дуу сонссон нь дээр. Ямар нэг таагүй дурсамж, мэдрэмж өдөөх үг сонсохгүй байвал зүгээр. Чадахаар бол дуундаа тааруулаад бүжиглэсэн ч болно. Ер нь орондоо хэвтэж байхдаа бүжиглэсэн ч яадын.

8. Сэтгэл гутралын үед хоол идэх хүсэлгүй байж болно. Үүнд ерөөсөө буруу юм байхгүй. Харин хальт юм идчихмээр санагдвал чихэрийн агууламжгүй, нүүрс ус багатай жимс ногоо, самар, өндөг идээрэй. Омега 3, витамин Д-ийн бэлдмэл уувал их сайн.

9. Энэ үед ажил, хичээл байтугай кино үзэх ч сонирхол төрөхгүй байж болно. Харин толгойд маш олон бодол, мэдрэмжүүд эргэлддэг. Утасныхаа note дээр өөрт төрж буй мэдрэмжүүдээ тэмдэглээд байгаарай. Сайхан муухай хамаагүй. Ер нь ингээд дадчихвал сэтгэл санаа сайхан болсон үед өөрийгөө илүү ойлгож, сонсож, хайрлаж сурсан байдаг.

10. Хэрвээ зураг зурах дуртай бол бал, харандаа, бийрээ бариад суучих, эсвэл хөгжим тоголдог бол дуртай хөгжмийн зэмсэгээ. Дотор байгаа мэдрэмжүүдээ гадагшлуулах гоё. Мэдрэмжүүдээ бичсээр байгаад гоё шүлэг, дууны үг гарах ч юм билүү?

11. Байгаль. Өөрт байгаа боломжоороо байгальтай ойр байгаарай. Нар, салхи, цас, цэцэг, шороо... Гэртээ ургамалтай бол очоод хүрээд үз, цэцэг байвал үнэрлээд эсвэл хараад суугаарай. Байгаль тайвшруулна.

12. Чадахаар бол гэрийнхээ ойр гадаа гараад 10-хан алхам ч хамаагүй алхаарай.

13. Энэ үед үнэхээр л хэнтэй ч яримааргүй санагддаг, харин хальт ярьчихмаар ч юм шиг байвал чамайг ойлгох хэн нэгэн рүү мессеж бичих эсвэл залгачих. Хэрвээ өөрөө ярьж чадахгүй бол нөгөө хүнээ сонсоод, хэн нь ч ярихгүй байсан ч зүгээр утсаа таслалгүй чихэндээ бариад хэвтсэн ч болно. Ер нь өөрөө өөрийгөө л тусгаарлаад байдгаас биш хамт байхад таатай байдаг, чамайг гэсэн хүмүүс ярилцъя, яваад очьё гэвэл боломжоороо утсаа аваад, гэртээ оруулаарай. (хөл хориогүй үед) Эхэндээ тэгж санагдахгүй ч хэдхэн минут хүнтэй хамт байсны дараа сэтгэл уужирчихсан байдаг.

14. Амьтан тэжээдэг бол амьтантайгаа, хэрвээ байхгүй бол од, нар, сартай ярьж ч болно. Ямар ч шүүмжлэлгүй, шоолохгүй, загнахгүй, чиний мэдрэмжийг үгүйсгэхгүй, аюулгүй зүйлтэй ярих нь их тусалдаг. Юуны ч талаар ярьсан болно. Өнөөдөр юу хийсэн, дуртай хоол, үзсэн кино, эсвэл бүр мэдрэмжүүдийнхээ талаар...

15. Өөрөө өөрийгөө тэврээрэй. Маш их тайвшрал, аюулгүй мэдрэмж төрүүлдэг.

За тэгээд гол нь энэ үед хэн нэгэнд тэнэг харагдахвий, хүнд ямар санагдах ямар ч хамаагүй. Чи л чухал. Өөртөө хамгийн таатай зүйлсээ боломжоороо хийгээрэй.

Өөрийгөө зэмлэлгүйгээр, онцгүй мэдрэмж төрөх бүрт өөрийгөө аргадаж, хайрлаарай. Чиний хамаг сайнаараа хичээж, сайхнаараа байгаа чинь чамайг гэхгүй хүнд бол хэзээд хангалтгүй л байдаг. Харин чамайг гэсэн хүмүүс чамайг ямар ч байсан хүндэлж, хайрласаар л байх болно. Энийг үргэлж санаж яваарай.

Degiverse