Ардчилсан намын Үндэсний бодлогын хорооны гишүүн Д.Мөнх-Эрдэнэ хэвлэлд өгсөн ярилцлагынхаа үеэр АН-д үүсээд буй нөхцөл байдлын талаар ийн ярьжээ.

Тэрбээр “АН-д үүсээд байгаа нөхцөл байдал нь тус намын дарга нарын хоорондын эрх мэдлийн тулаанаас болсон. Манай нам цадсан муурын амнаас гараад цаддаггүй өлөн нохойн аманд орох шахлаа шүү дээ. Цадсан муур гэдэг нь ойлгомжтой, гишүүдээс 100, 100 саяын татвар авдаг, намын гишүүдээ мөнгөөр уралдуулдаг намын өмнөх дарга. Харин цаддаггүй нохой гэдэг нь Х.Баттулгыг хэлж байгаа юм. Албан тушаал авах болохоороо намаа ашиглана. Ашиглаж дуусчхаад өөр хүмүүстэй нийлж намаа “түгжилдэж” унагаадаг.

АН өнөөдөр Ц.Туваан, С.Эрдэнэ гэж хоёр талд хуваагдаж байх шиг байна. Ц.Тувааны ард Х.Баттулга бий. Ц.Туваан их зөөлөн хүн шүү дээ, хүний үгнээс гардаггүй. Х.Баттулга өөрийнхөө зөвлөх ч билүү нэг “барлаг” нөхрийг АН-ын ХЭГ-ын даргаар хууль бусаар томилуулсан. Тэд нар нь намын аппаратыг өөрсдөө зохион байгуулаад хууль бусаар намын их хурлыг хуралдуулж, намын дүрмийг өөрчлөн баталсан.

Тус дүрэмдээ одоогийн Ерөнхийлөгч Х.Баттулга Ерөнхийлөгчийн сонгуульд АН-аас өрсөлдөгчгүй нэр дэвшинэ гэх хөгийн заалт оруулсны ард Х.Баттулга л бий шүү дээ.  2014 онд хамгийн мөрөөрөө ажиллаж байсан Н.Алтанхуягийн ЗГ-ыг заналтайгаар унагаасан хүн нь одоогийн Ерөнхийлөгч Х.Баттулга. Үүнээс болж АН ялагдсан. Х.Баттулга 2011 онд МоАХ-ны нэр дээр ҮБХ-ны 70 гаруй гишүүнтэй фракц байгуулсан.

Энэ бол ҮБХ-ны нийт гишүүдийн гуравны нэгийг бүрдүүлэх хүчтэй фракц. Үүнд өөрийн хүмүүсийг мөнгөөр нэр дэвшүүлж, тэдэнтэйгээ нийлж Засгийн газраа унагаасан. Засгийн газрыг унагаахын өмнө хэл ам болоод байсан төмөр замын 280 сая ам.доллараа авчихсан байсан. Сайншандын аж үйлдвэрийн парк, Шинэ сум төсөл гэх мэт дээр баахан мөнгө авчихсан. Тэр мөнгийг нь хулгай боллоо гээд сүүлд хууль шүүхийнхэн мөрдөн байцаалт хийж байсныг санаж байна. Х.Баттулга түүнийгээ “баллуурдах” гэж Засгийн газраа унагаасан.

Үүнээс болж АН 2016 онд 65-аараа ялагдсан шүү дээ. Ялагдлын суурийг Х.Баттулга тавьсан. Албан тушаал авах, Ерөнхийлөгчид өрсөлдөх болохоороо намаасаа нэр дэвшдэг, харин шоронд явах болохоороо хамгаалуулдаг. 2008 оноос хойш төмөр зам гэж ярьсан тэр нь хаана байна. 280 сая ам.доллар завшсан гэдгийг хууль шүүхийн байгууллага нотлоод нэгжлэг хийгээд явж байсан шүү дээ.

Харин шүүхээр орохоосоо өмнө амжаад ардчиллын буянаар Ерөнхийлөгч болчихсон. Ц.Элбэгдорж хэлсэн шүү дээ, Х.Баттулгад хүний нөөц гэж байхгүй, хулгайчийн нөөц л гэж бий гэж, тэр үнэн. Ерөнхийлөгчөөр дөрвөн жил ажиллаж байхад одоо болтол хуулийн зөвлөхгүй. Хуульч нар хулгайч дээр очдоггүй юм. Намын буянаар хоёр, гурван удаа сайдаар ажиллаа дураа хүрэхээр ажлаа хаяад явдаг, дургүйгээ хүрэхээр засгаа огцруулдаг “түгжил” шүү дээ.

Намаасаа сунгаанд орохоос айгаад өрсөлдөгчгүйгээр Ерөнхийлөгчид нэр дэвшихийн тулд намын дүрэмд хулгайгаар заалт оруулж тэр нь саяхан баригдаад онигоо боллоо шүү дээ. Ийм хачин дөрөвдүгээр ангийн хүүхэд шиг юм хийдэг. Аргагүй юм даа боловсрол нь тийм юм чинь. Ардчилсан намд олон сайхан залуучууд байна. Тиймээс манай нам шинэчлэгдэнэ. Мөн Ерөнхийлөгчид нэр дэвших олон лидер бий. Одоо АН боловсролтой, нээлттэй удирдагчтай болох хэрэгтэй байна” хэмээн ярилцлага өгчээ.