Цагаан захтнууд хөрөнгөө виртуал хэлбэрт шилжүүлж эхлэв үү?
Манай улс саарал, хар жагсаалт гарсан хэдий ч Санхүүгийн хориг арга хэмжээ авах байгууллага ФАТФ-аас гаргасан 40 зөвлөмжийг хэрэгжүүлэх үүрэг хүлээсэн. Тус зөвлөмжийн 15-д тухайн улсын мөнгө угаах, терроризмыг санхүүжүүлэхтэй тэмцэх тогтолцоо нь “виртуал хөрөнгө”-д нэгэн адилаар үйлчлэх өөрчлөлт орсон.
Монгол Улс ФАТФ-ын зөвлөснөөр нэн даруй Виртуал хөрөнгийн үйлчилгээ үзүүлэгчийн тухай хууль батлах шаардлагатай. Мөнгө зөвхөн цаасаар эсвэл зоосоор илэрхийлэгдэхээ больж, сүлжээгээр урсаж, бас орлосон янз бүрийн төлбөрийн хэрэгслүүд гарсаар байгаа учир уг хуулийг батлахыг ФАТФ зөвлөжээ.
Цагаан захтнууд хөрөнгөө виртуал хэлбэрт шилжүүлж эхлэв үү гэх хардлага байгаа аж. Виртуал хөрөнгө нь мөнгө угаах, терроризмыг санхүүжүүлэх, татвараас зугтах болон бусад хууль бус ажиллагааны хэрэгсэл болохоос гадна мэдээллийн технологийн эрсдэлийг үүсгэх, хэрэглэгчийн эрх ашгийг зөрчих, улмаар санхүүгийн тогтвортой байдалд сөргөөр нөлөөлөх үр дагавартай.
Тиймээс холбогдох газраас хуулийн төсөл боловсруулж, төрийн байгууллага, иргэдээс санал авч эхэлсэн аж. Виртуал хөрөнгө гэж дижитал хэлбэрээр арилжих, хувиргах, шилжүүлэх боломжтой төлбөр тооцоо болон хөрөнгө оруулалтын зорилгоор ашиглах боломжтой үнэ цэнийг ойлгоно гэж тодорхойлжээ. Гэхдээ дижитал хэлбэрээр илэрхийлж болдог албан ёсны мөнгөн тэмдэгт, үнэт цаас болон бусад санхүүгийн хөрөнгийг тусгайлан оруулаагүй байна.
Виртуал мэргэжилтэн нь виртуал хөрөнгийг албан ёсны мөнгөн дэвсгэртэд хөрвүүлэх, олон төрлийн виртуал хөрөнгийг хооронд нь арилжих, хөрөнгийн шилжүүлэг гүйцэтгэх, хөрөнгийг хадгалах, хэтэвч үүсгэх, виртуал хөрөнгийг удирдах хэрэгслийг зохицуулах, виртуал хөрөнгийг худалдахтай холбоотой санхүүгийн үйлчилгээ үзүүлдэг аж. Манай улсын иргэн, хуулийн этгээд виртуал өмч, хөрөнгө эзэмшдэг эсэх, ийм хөрөнгийн үйлчилгээ үзүүлэгч этгээд байгаа, эрсдэлийг тодорхойлсон талаар албан ёсны судалгаа байдаггүй.
Гэхдээ олон нийтийн мэдээллийн хэрэгслээр крипто-валют олборлодог тоног төхөөрөмж манай улсад хэдийн нэвтэрч иргэд орлого олох зорилгоор худалдан авч байршуулсан тухай мэдээлэл байдаг. Виртуал хөрөнгө олж авах, шилжүүлэх, үйлчилгээ авах нь зөвхөн манай улсын хил хязгаараар хязгаарлагдахгүй. Олон улсын эрхтэй төлбөрийн карт ашиглан интернэтээр дамжуулан хэн ч хэзээ ч ашиглах эрсдэл өндөр байгааг “Виртуал хөрөнгийн үйлчилгээ үзүүлэгчийн тухай” хуулийн төсөл боловсруулсан судлаачид онцолсон билээ.
