2017 оны Ерөнхийлөгчийн сонгуулиар Х.Баттулгыг МАН-ын У.Хүрэлсүх, Л.Оюун-Эрдэнэ илэрхий дэмжиж байсан тухай найруулагч Баатарын “Морь морь” гэдэг бичлэгээс харагддаг шүү дээ. Үүний дараагаар Үндсэн хуулийн бус аргаар хууль хяналтын байгууллагуудын удирдлагыг өөрчилж У.Хүрэлсүх, Х.Баттулгын улс төрийн хоршил чамгүй ажил амжуулсан.
Энэ хоршил Эрдэнэтийн 49 хувь, Салхитын мөнгөний орд, С.Зоригийн хэрэгтэй холбоотой асуудлаар нэр бүхий албан тушаалтантай хариуцлага тооцож чадсан байдаг. Оюутолгой, Тавантолгой гэрээ болон гадны компанид үйлчилсэн эрх мэдэлтнүүдийг Шүүхийн тавцанд дуудаж чадсан. Х.Баттулга, У.Хүрэлсүх, Г.Занданшатар нар зангидсан гар шиг ажиллаж байсан нь Коронавирусийг хохирол багатай давахад нөлөөлөх байлаа.
Гэтэл Х.Баттулга Ерөнхийлөгчийн сонгууль ойртох хэрээр АН руугаа очих, тэндээс нэр дэвших учраас гишүүдээсээ оноо авах хэрэгтэй болно. АН-ын зүгээс Х.Баттулга УИХ-ын сонгуульд МАН-д үйлчилсэн, илэрхий дэмжсэн гэх гомдол явдаг. Мөн АН-ын гишүүн Ч.Сайханбилэг, С.Баярцогт, Д.Эрдэнэбат, Б.Болор, Да.Ганболд нарыг шорон хийсэн гэх буруутгал бий.
Х.Баттулга хууль хяналтын байгууллагыг хяналтандаа байлгах хэрээр Голомтын Баясгаланг шоронд суулгаад сарын дараа Гавъяат цол олгоод Төмөр зам бариулахаар явуулсан. Энэ бүгд олон нийтэд эргэлзээ төрүүлэхийн хэрээр Х.Баттулга Худалдаа хөгжлийн банк, Голомт банкуудад дарамтлаад хувь авсан гэх мэдээлэл тарсан нь хүртэл бий.
Өнгөн талаасаа харахад Х.Баттулга У.Хүрэлсүхийнхээ бөөрнөөс шаасан гэдэг нь тодорхой. Ц.Нямдорж нэгэнтээ “Н.Алтанхуягаа чиний бөөр рүү Х.Баттулга шаана шүү” хэмээн анхааруулж байсан. Тэр анхааруулга ёсоор болж Н.Алтанхуягийн Засгийн газрыг Х.Баттулга заналтайяа огцруулж билээ. Үүнтэй адилхан У.Хүрэлсүхийн Засгийн газрыг унагах жагсаал цуглаан зохион байгуулсан нь тодорхой болж тэдний зам энэ хүрээд саллаа.
Эх сурвалж: barimt.mn
