"Сайн" ломбардыг тоносон этгээдийг олсон ч 600 сая төгрөгийн үнэ бүхий эд зүйлс хаачсан нь тодорхойгүй байна
Баянгол дүүргийн арваннэгдүгээр хороонд байрлах “Сайн” ломбардыг эрүүгийн "элемент" гэгдэх М.Мөнх-Од бусадтай бүлэглэн тоносон хэрэг арванхоёрдугаар сарын 17-ны өдөр гарсан. Түүнийг 10 гаруй өдөр эрэн сурвалжилсны эцэст өчигдөр 11.00 цагийн үед БЗД-ийн Чулуу овоо орчмоос баривчилсан тухай бид мэдээлсэн.
Мөрдөн шалгах ажиллагааны явцад дээрх хэрэгтэн "Сайн" ломбардаас 600 сая төгрөгийн үнэ бүхий эд зүйлс дээрэмдсэн болох нь тогтоогджээ. Цагдаагийн байгууллага хулгайд алдагдсан эд зүйлсийг олж тогтоохоор ажиллаж байна. Гэвч хэрэгтэн дээрэмдсэн эд зүйлсээ хаана нууснаа хэлэхгүй байгаа бөгөөд өөрийн орогнуулж байсан айлын хаягийг ч хэлэхгүй гүрийж байгаа сурагтай.
М.Мөнх-Өд нь 2006 оны зургадугаар сарын 13-нд Чингэлтэй дүүргийн шүүхээс хүн амины хэргээр ял шийтгүүлж байжээ. Улмаар сар хүрэхгүйн дараа буюу 2006 оны долдугаар сарын 7-нд Өршөөл үзүүлэх тухай хуулиар хорихоос суллагдсан байна. Гэсэн ч гэмт этгээд засарсангүй. Бусдын эд хөрөнгийг санаатайгаар гэмтээсэн, иргэдийг дээрэмдсэн, танхайрсан хэргээр 2010 оны арваннэгдүгээр сарын 9-нд Сэлэнгэ аймгийн сум дундын шүүхээс ял шийтгүүлжээ.
Ял шийтгүүлсэн М.Мөнх-Од нь Багануурын хорих ангиас оргож байсан аж. Түүний өдүүлсэн хэрэг үүгээр дууссангүй 2016 оны нэгдүгээр сарын 18-нд бусдын биед хүнд гэмтэл учруулсан хэргээр дөрөв дэх удаагаа ял сонссон аж. Улмаар өнгөрсөн оны есдүгээр сард хорих ангиас суллагдсан байна. Өмнө нь гэмт хэрэг үйлдээд тэрбээр мөн л оргон зугтаж байсан гэнэ.
Цагдаагийнхан түүнийг баривчлахын тулд нэлээд эрэл сурал болж байж. М.Мөнх-Од нь суллагдсанаасаа хойш нэг жилийн хугацаанд биеэ үнэлэгчидтэй ойр байсныг эх сурвалж хэлсэн юм. Ломбард бүлэглэн дээрэмдсэн этгээдүүд нь бүгд хамт ял эдэлж байсан гал хамууд нь гэнэ. М.Мөнх-Од нь бүтэн өнчин, харж хандах хийгээд хэлж зөвлөх хүнгүй, тарчиг ядуу, хайр халамж үзээгүй шахам өссөн нэгэн аж.
Эх сурвалж: Өдрийн сонин
