АНУ-ын 50 мужийн саналыг дахин тоолсонд сонгуулийн үр дүн өөрчлөгдөөгүй ч Трамп шантарсангүй
Цар тахлаар 15.8 сая хүн халдварлаж, 300 мянга шахам иргэн нас барсан үзүүлэлтээр дэлхийд тэргүүлж байгаа АНУ-ын Ерөнхийлөгчийн сонгууль өнгөрөгч сарын 3-нд болсон ч өнөөдрийг хүртэл дуулиан нь намжсангүй. Энэ нь экс ерөнхийлөгч Дональд Трамп ялагдлаа хүлээн зөвшөөрөхгүй, шүүхээр заргалдаж байгаатай холбоотой юм.
Баруун Виржиниа муж Дональд Трамп тус мужаас таван төлөөлөн сонгогчийн санал авсныг лхагва гаригт зарласнаар АНУ-ын 50 муж бүгд ерөнхийлөгчийн сонгуулийн дүнг баталгаажуулж дууслаа.
Ингэснээр Жо Байден 306, Трамп 232 төлөөлөн сонгогчийн саналтайгаар сонгуулийн санал хураалтын дүн эцэслэв. Үүний дараагийн үе шат болох төлөөлөн сонгогчдын коллегийн гишүүдийн уулзалт энэ сарын 14-нд болно. Харин Конгрессын нэгдсэн хурлаар нэгдүгээр сарын 6-нд төлөөлөгчдийн саналын тоог эцэслэх юм.
Бүх муж санал хураалтын эцсийн дүнгээ зарласантай зэрэгцэн Трамп Жо Байдены ялсан дөрвөн мужийн саналыг хүчингүй болгох саналаа Дээд шүүхэд хүргүүлжээ. Тодруулбал, Жоржиа, Мичиган, Пенсилваниа, Висконсин гэсэн мужуудын саналыг хүчингүй болгох өргөдлийг Техасын Ерөнхий прокурор Кен Пахтон шүүхэд өгсөн байна.
“Энэ бол 1860 оноос хойших хамгийн их маргаантай, улс орныг талцуулсан сонгууль боллоо. Зарим мужийн сонгуулийн ажилтнууд нэг намд давуу эрх олгож сонгуулийг хуулийн дагуу явуулж чадаагүй” гэж тэрбээр өргөдөлдөө бичжээ.
Гэвч үүний өмнөх өдөр нь Пенсилваниа муж санал тоололтыг зогсоох түүний шаардлагыг хүлээн аваагүй байсан юм. Гэсэн ч Трамп тэмцлээ үргэлжлүүлсээр сонгуулийн дүнг хүчингүй болгохыг шаардсаар байна.
Эх сурвалж: BBC
