Бүгд найрамдах хятад ард улсын үндэсний статистикийн хороо өнгөрөгч ням гарагаас эхлэн бүх Хятадын 7 дахь удаагийн хүн амын ерөнхий тооллогыг албан ёсоор эхлүүлжээ.
Тус хорооны мэдээлснээр, хүн амын тооллогын мэдээллийг боловсруулж, дүн шинжилгээ хийхэд хоёр жил орчмын хугацаа шаардагдах юм байна.
Эх газрын Хятад дахь хүн ам зүйн өнөөгийн байдлын талаарх мэдээлэл цуглуулах ажилд долоон сая гаруй хүн оролцох бөгөөд ирэх 12 дугаар сарын эхэн хүртэл үргэлжлэх төлөвтэй байна.
7 дахь удаагийн судалгааны ажлын хүрээнд БНХАУ-ын нийт хүн амын тоог тодруулахаас гадна, ард иргэдийн хүйсийн харьцаа, улс орон дахь ажил эрхлэлт, боловсролын түвшин түүнчлэн насны талаарх мэдээллийг цуглуулахаар төлөвлөжээ.
Энэ удаагийн хүн амын нэгдсэн тооллогын үеэр эх газрын хятадын иргэдээс гадна тус улсад зургаан сараас дээш хугацаагаар амьдарч байгаа түр оршин суух эрхтэй гадаадын иргэдийн мэдээллийг цуглуулах юм байна.
Үүнээс өмнө 1953, 1964, 1982, 1990, 2000 болон 2010 онд бүх хятадын хүн амын ерөнхий тооллогыг явуулж байсан бөгөөд тус улсын засаг захиргааны тусгай бүсүүд болох Хонконг, Макао болон Тайванийн хүн амын тоог энэхүү ерөнхий тооллогод оруулдаггүй байна.
2019 онд Хятадад шинээр мэндэлсэн хүүхдийн тоо хамгийн доод хэмжээнд хүрсэн нь тус улсын 70 жилийн түүхэнд байгаагүй муу үзүүлэлт болжээ.
Хятадын Үндэсний Статистикийн Хорооноос гаргасан тоо баримтаас үзвэл тус улсын төрөлтийн үзүүлэлт өнгөрсөн онд 1,000 хүн тутамд 10.48 болж буурсан байна.
Энэ нь 1949 онд БНХАУ байгуулагдсан цагаас хойшх хамгийн доод үзүүлэлт бөгөөд гурав дахь жилдээ дараалан буурсан үр дүн юм.
Ганц сайн тал нь өнгөрсөн оны бууралт өмнөх оныхоос бага байсан байна. Тухайлбал 2017-оос 2018 онд мянган хүн тутамд 12.43 төрөлт байснаа 10.94 болж огцом буурсантай харьцуулбал 2018-аас 2019 онд бууралт бага хэмжээтэй байгааг статистикийн хорооны дарга Нинь Жизе онцолжээ.
Гэхдээ л 2019 онд 14.6 сая хүүхэд төрсөн нь өмнөх оноос 500,000 орчмоор буурсан үзүүлэлт болж байна.
Хятад улс хүн амынхаа хэт өсөлтийг хязгаарлахын тулд 1980-аад оны эхээр “нэг хүүхэд” бодлогыг хэрэгжүүлж эхэлсэн юм. Гэтэл хүн ам нь хөгширч, төрөлт буурч эхэлсэн тул 2015 онд Бээжингийн эрх баригчид энэ бодлогоо цуцалж, гэр бүлүүдэд хоёр хүүхэдтэй болохыг зөвшөөрч эхэлжээ.
Эх сурвалж: BBC
