"Монгол" гэсэн нэрийг хараалын үг болгон ашигласан "Формула-1"-ийн нисгэгчийг уучлал гуйхыг шаарджээ
Шотландад төвтэй "Mongol Identity" ТББ “Формула 1” уралдааны жолооч Макс Верстаппен өрсөлдөгч багийн жолооч Ланс Строллыг "монгол" хэмээн доромжилсны дараа олон нийтээс уучлал гуйх шаардлага тавьж захидал илгээжээ.
Баасан гарагийн үдээс хойш "Autódromo Internacional do Algarve" уралдаан дээр "Red Bull" багийн нисгэгч Макс Верстаппенийг "Racing Point"-ийн нисгэгч Ланс Стролл 1-р эргэлтэд гүйцэж түрүүлэх үеэр тэд мөргөлдөх дөхсөн байна.
Верстаппен радиогоор бухимдсанаа илэрхийлж: "Энэ новш сохор юмуу? Ямар эргүү амьтан бэ. Муу монгол чинь" гэжээ. Верстаппен хожим нь хараалын үгс хэрэглэсэндээ харамсахгүй байна гэсэн бөгөөд хэрэв хэн нэгэн түүний хэлсэн үгэнд гомдсон бол энэ нь түүнд хамаатай асуудал биш гэж үзэж байгаагаа ч илэрхийлсэн юм.
Макс Верстаппен нь Нидерланд улсын иргэн бөгөөд тус оронд "монгол" гэсэн үгийг хараал болгон хэрэглэж, ярианы хэлэнд хэвшсэн хэллэг болсоны нэгэн тод илрэл юм. Верстаппений энэхүү үйлдэлд "Монгол Identity" байгууллагын тэргүүн Ууганаа Рамсай харамсаж байгаагаа илэрхийлээд “Формула 1” -ээс түүнд хариуцлага хүлээлгэхийг шаарджээ. Ууганаа Рамсай нь монгол бүсгүй бөгөөд Шотландад гэр бүлтэйгээ ажиллаж, амьдардаг.
Тэрээр Монгол гэсэн үгийн энэхүү гажсан утгыг залруулан ойлгуулах, зүй бусаар хэрэглэхийг таслан зогсоох, Монгол нэрний ард бүхэл бүтэн улс, үндэстэн байгаа гэдгийг дэлхийн олон үндэстэнд ухуулан ойлгуулахын төлөө тэмцсээр иржээ. "Бид Монгол гэсэн нэр томъёог дорд утгаар хараалын үг болгон ашиглахыг эрс эсэргүүцэж байгаагаа илэрхийлмээр байна. “Формула 1” нь олон үндэстнийг хамарсан, нэр хүндтэй байгууллага хэдий ч яс үндэс, угсаа гарлаар доромжилсон энэ мэт хэллэгийг буруутгаагүйд бидний урам хугарсан. Цаашдаа бид тус байгууллагын удирдах зөвлөлд хандах болно. Дауны синдромтой хүмүүст хамааралтай "монголоид" хэмээх нэр томъёог 1965 онд ДЭМБ-аас монгол угсаатныг доромжилсон гэж үзэж хассан билээ. Тиймээс уг нэр томъёоны цаад утгыг үндэслэсэн нийгмийн эмзэг бүлгийн гишүүдэд болон олон улсын монголчуудын нийгэмлэгт хүндэтгэлтэй, хүнлэг энэрэнгүй хандах үүднээс олон нийтийн өмнө уучлал гуйхыг хүсч байна." гэж Рамсай мэдэгджээ.
Верстаппены хандлага, “Формула 1” байгууллагын зүгээс өдийг хүртэл хариу арга хэмжээ авахгүй байгаа нь #WeRaceAsOne буюу "Бид нэг болж уралдана" хэмээх уриатай, тэдний хүнийг гарал үүслээр гадуурхахгүй байх компанит ажил нь төдийлөн амжилтад хүрэхгүй байгааг харуулсан гэж Рамсай үзэж байгаагаа илэрхийлжээ.
"Red Bull" багийн эзэн Кристиан Хорнер өөрийн нисгэгч Верстаппеныг "сэтгэл хөдлөлдөө хөтлөгдөж ингэж хэлсэн болохоор харж үзээрэй" хэмээн жиргэсэн байна. Мөн "Red Bull" авто спортыг хариуцсан захирал Хельмут Маркогийн хэлснээр энэ асуудлыг Верстаппентэй ганцаарчлан ярилцаж, "Цаашид ийм зүйл давтагдах ёсгүй гэж бид Максд сануулсан. Энэ үнэхээр байж болохгүй явдал" гэж мэдэгджээ. Энэ асуудал Верстаппенд цаашид олон талаар нөлөөлөх магадлалтай байгаа бөгөөд Олон улсын авто уралдааны холбоо энэ асуудлыг анхааралдаа авах нь дамжиггүй юм.
Эх сурвалж: f1i.com
