Энэ оны эхээр Өмнөд Солонгосын армийн бэлтгэл цэрэг Сөүл орчим дахь сургуулилтын баазад бэлтгэл хийж байх үедээ “K-2” буугаар гал нээж, хоёр цэргийн амийг хөнөөн, хоёр цэргийг шархдуулсны дараа өөрийгөө буудан хөнөөсөн хэрэг гарсан билээ.

Өмнөд Солонгосын иргэд армидаа хоёр жил алба хаагаад чөлөөт цэргийн албан хаагч болдог бөгөөд тэд найман жилийн турш жилд нэг удаа армийн зэвсэгт сургуулилтад оролцож бэлэн байдлаа шалгуулдаг байна. Яг ийм сургуулилалт Сөүлийн ойролцоох цэргийн баазад болсон бөгөөд оролцсон бүх чөлөөнд байгаа цэргийн албан хаагчдад буу зэвсэг тарааж өгчээ. Энэ үеэр Чой овогт нэгэн бусад хүмүүс рүү буудаж эхэлсэн байна. Түүнд хамгийн ойр байсан хоёр албан хаагч газар дээрээ нас барсан ба өөр нэг цэрэг болон сургагч офицер буудуулан газар унасан байна.

Шуугиан дэгдэж цэргүүд түүн рүү буу шагайж зэвсгээ хаяхыг шаардахад тэрээр өөрийгөө буудаж амиа егүүтгэсэн байна. Шинжээч, мөрдөгч нар энэ хэрэг явдлыг ямар нэгэн террорист халдлагын учир шалтгаан байхгүй цор ганц амиа хорлогчийн сэтгэлзүйн байдал тогтворгүй, ямар нэгэн асуудалтай байсан нь ийм харамсалтай явдалд хүргэсэн гэдгийг зарлаад байгаа юм.

Армийн хэвлэлийн төлөөлөгч Ко Донг Хьюний хэлснээр бол Чой овогт автомат К-2 буундаа байсан сумыг бараг дуусгасан бөгөөд дөрвөн хүн оногдсон гэжээ.

Өнгөрсөн жил үүнтэй төстэй хэрэг хэд хэд гарсан юм. 2019 оны тавдугаар сард буун дуу гаргасан цэрэг нь байнгын албан хаагч бөгөөд гранат дэлбэлж хамт алба хааж байсан таван нөхрөө хөнөөж долоог нь шархдуулсан бол 2019 оны наймдугаар сард мөн л цэргийн ангид буун дуу гарч нэгэн цэрэг гурван офицероо буудан хөнөөсөн юм.

Сэтгэлзүйн тогтворгүй байдлын улмаас гартаа байгаа галт зэвсгээ ашиглан бусдад уур бухимдлаа гарган хүний аминд хүрэх, эргээд өөрийгөө хорлох явдал Өмнөд Солонгосын армид ойр ойрхон гарах болсныг энэхүү хэрэгтэй холбон дэлхийн хэвлэл мэдээллийн хэрэгслүүд онцолж байна.

Дэлхийн эрүүл мэндийн байгууллагаас гаргасан 2019 оны судалгаагаар амиа хорлолтын түвшнээр БНСУ улс дэлхийд хоёрдугаарт буюу Литва улсын дараагаар бичигджээ.  

Литва улс нь амиа хорлолтын хувиар 100 мянган хүн амд ноглох хувь нь 31 гэсэн үзүүлэлтээр тэргүүлсэн ба эдийн засаг, улстөрийн хувьд тогтворгүй, хүн амынх нь дийлэнх хэсэг ажилгүй, амьдралын түвшин доогуур байдаг нь гол хүчин зүйл болдог аж. Тиймээс тус улсын амиа хорлож буй иргэдийн дийлэнх хувийг 35-54 насны эрчүүд эзэлдэг тооцоо гарчээ.

Харин БНСУ-ын хувьд эдийн засгийн хувьд тогтвортой, иргэдийн амьжиргааны түвшин ч харьцангуй өндөр, улстөрийн байдал тайван хэрнээ 100 мянган хүн амд ногдох амиа хорлолт нь 28.1 хувь гэсэн өндөр үзүүлэлттэй байна.

Энэ тоо сүүлийн жилүүдэд огцом өсч буйг ч Дэлхийн эрүүл мэндийн байгууллагаас онцолжээ. Тус улсын амиа хорлож буй иргэдийн дийлэнх хувийг 60-аас дээш насныхан эзэлдэг байсан бол сүүлийн жилүүдэд улам залуужиж өсвөр насныхны дунд амиа хорлолт өсч байгаад БНСУ-ын Засгийн газраас ч онцгой анхаарах болсон байна.

Өндөр настнуудын амиа хорлолтын шалтгаан нь уламжлалт ёс заншлын дагуу үр хүүхэд нь эцэг эхтэйгээ хамт амьдарч асрах ёстой байдгаас тэдэндээ төвөг чирэгдэл учруулахыг хүсээгүйдээ амиа хорлох нь их байдаг гэжээ.

Харин залуусын дунд ихсэх болсон амиа хорлолт нь илүү нийгмийн хамааралтай байдаг байна. Хичээл сурлага, нийгэмд эзлэх байр суурь, эцэг эхийн дарамт, сургууль дээрх хүүхдүүдийн дарамт гэх мэт маш олон хүчин зүйл байгаагаас сүүлийн үед хүчээ авах болсон гоо сайхны мэс заслын хэт их сурталчилгаа өсвөр насныхны сэтгэлзүйд асар хүчтэй нөлөөлж байна гэж үзжээ. Мөн тус улсын урлаг соёлын одод амиа хорлох нь маш их болсон нь хүмүүсийн сэтгэлзүйд ихээр нөлөөлөх болсон байна.

Тус орны кино жүжигчид, дуучид гээд шоу бизнесийн одод нь гоо сайхны мэс засал хийлгэсэн “төгс” гоо сайхантай хүмүүс болсон байдаг нь өсвөр насныханд өөрийгөө голох, өөртөө итгэлгүй болох, гоо сайхны мэс засал хийлгэн амьдралаа эрс өөрчлөх мөрөөдөлд автуулах зэрэг сөрөг нөлөөг үзүүлж эхэлсэн байна.

Энэ нь хүйсийн хувьд ялгаагүй нөлөөлж байгаа ч дурьджээ. Тиймээс өөрөөс нь бусад хүмүүс илүү сайхан, илүү гоо үзэсгэлэнтэй, илүү баян чинээлэг амьдарч буй мэт сэтгэгдэл байнга төрж, түүнээсээ болж бусдыг шалтгаангүйгээр үзэн ядах, бухимдах, өөрийгөө нийгмээс тусгаарлах зэрэг сэтгэлзүйн өвчлөлүүд нэмэгджээ.

Эдгээрээс үүдэн БНСУ-ын иргэдийн амиа хорлолт нь өөрийгөө дүүжлэх, эм уух, өндрөөс үсрэх, гал тэрэгний зам руу үсрэх зэрэг түгээмэл байсан хэлбэрүүдээсээ илүү харгис, бусдыг эхэлж хөнөөгөөд дараа нь өөрийгөө егүүтгэх хэлбэр рүү шилжиж байгаа аж.

Эх сурвалж: Psychology Daily