Тесла, Вольво, Форд болон Мерседес-Бенз компаниуд Хятадын импортын сэлбэгүүдэд тогтоосон гаалийн татварт сэтгэл хангалуун бус байгаагаа илэрхийлж, Д. Трампын засгийн газраас нөхөн төлбөр нэхэж байгаа аж. 2018 оноос хойш БНХАУ, АНУ хоёр орны харилцаа хурцдаж, талууд бие биедээ худалдааны "дайн" зарласан билээ. Түүнээс хойш хоёр улс харилцан бие биенийхээ импортын бараа бүтээгдэхүүний гаалийн татварыг огцом нэмэгдүүлсэн юм.

Сүүлийн долоо хоногуудад л гэхэд талууд технологийн компаниудын асуудлаар зөрчилдсөөр байгаа юм. Мерседес-Бенз компани Д. Трампын засгийн газрын зарласан худалдааны дайн БНХАУ-аас 500 тэрбум ам. долларын үнэ бүхий бараа бүтээгдэхүүн импортлох явдалд саад болсон хэмээн мэдэгдэж байгаа бол Тесла компани Америкийн эрх баригчид дээрх татварыг өөрсдийн дураар, үзэмжээрээ тогтоосон хэмээн үзэж буйгаа илэрхийлжээ. Машин үйлдвэрлэгч компаниуд импортын татварыг цуцалж, нөхөн төлбөр олгохыг Вашингтоноос шаардаж байгаа аж.

Ерөнхийлөгч Доналд Трампын хувьд БНХАУ-ыг худалдааны салбарт шударга бус үйл ажиллагаа явуулдаг, оюуны өмчийг хулгайлдаг хэмээн буруушааж байгаа бол Хятадын эрх баригчид БНХАУ дэлхийд эдийн засгаараа тэргүүлэхээс АНУ эмээж байна хэмээн үзэж байгаа аж. Энэ оны эхээр хоёр улс хэд хэдэн асуудал дээр зөвшилцөлд хүрснээр Вашингтон Хятадын 160 тэрбум ам. долларын үнэ бүхий импортын бараа бүтээгдэхүүнд татвар ноогдуулах шийдвэрээ цуцалсан билээ. Гэсэн хэдий ч түүнээс хойш хоёр улсын харилцаа улам ихээр хурцдаад байгаа билээ.

Энэ сарын эхээр Дэлхийн Худалдаан Байгууллага Хятадын импортын бараа бүтээгдэхүүнд тогтоосон АНУ-ын татвар олон улсын худалдааны дүрэмд нийцээгүй гэсэн дүгнэлт гаргасан ба Хятад улс оюуны өмчийг хулгайлдаг гэсэн үндэслэлээ Вашингтон батлаж чадаагүй гэжээ.

Эх сурвалж: BBC