Хиймэл оюун бүхий гэрлэн дохио агаарын бохирдлыг бууруулна
Агаарын бохирдол ихтэй уулзваруудад автомашины түгжрэл аль болох бага үүсгэх замаар замын хөдөлгөөн зохицуулах чадвартай “ухаалаг” гэрлэн дохиог Их Британийн "Now Wireless" компани бүтээлээ. Хиймэл оюун бүхий гэрлэн дохио ашиглаж хотын төвийн дүүргүүдэд машины яндангаас гардаг бохир утааг бууруулснаар иргэдийн амьдрах илүү эрүүл, таатай орчин бүрдэнэ.
Ийм гэрлэн дохио нь замын хажуугийн сенсорууд, цаг агаарын урьдчилан сэргийлэх мэдээ, автомашинуудаас утасгүй холболтоор орж ирэх өгөгдөлд тулгуурлан угаарын болон бусад төрлийн хорт хийн агуулга ихэссэн газруудыг тодорхойлж байх юм. Мөн урьд өмнөх хуучин статистикт тулгуурлан өдрийн ямар үед агаар илүү бохирдож болзошгүйг урьдчилан тодорхойлох чадвартай.
Агаар дахь хорт бодисын хэмжээ зөвшөөрөгдөх түвшнээс ихсэх тохиолдолд улаан, ногоон гэрэл солигдох хугацаа болон давтамжийг 20 секундын хязгаарт уян хатан өөрчилж явна. Жишээ нь агаарын бохирдолтой уулзварт нэвтрэх гэж буй авто машинуудыг хүлээлгэх улаан гэрэл 20 секундаар удаан асаж, аюултай бүсээс гарах гэж буй машинуудад хандах гэрэл ногоон асаатай байх юм.
Энэ оны эцсээр Волверхэмтпон хотод эхлүүлэх төлөвлөгөөтэй ухаалаг гэрлэн дохионы системийн туршилтыг нэгдсэн вант улсын өөр хэд хэдэн хотын захиргаа мөн сонирхож байна. Улаан гэрлэн дохиотой уулзварт хүлээх машины тоо олширч, хугацаа нь сунах юм бол хотын өөр хэсэгт шинээр агаарын бохирдол үүсэх эрсдэлтэй хэмээн уг системийг шүүмжлэгчид үзэж байна.
Эх сурвалж: Forbes
