Норвегийн парламентийн гишүүн Кристиан Тибринг-Гжедде Ерөнхийлөгч Трампыг Израйль, Арабын Нэгдсэн Эмират улсуудын хооронд байгуулсан энхийн хэлэлцээрт зуучлагчийн үүрэг гүйцэтгэсэн учраас 2021 оны шагналд дэвшүүлсэн гэжээ.

Кристиан Тибринг-Гжедде Лхагва гарагт "Fox News" сувагт "Тэрбээр жинхэнэ энх тайвныг бий болгож чадсан учраас энэ шагналд нэр дэвшиж байгаа бусад хүмүүсээс илүү том их зүйл хийсэн гэж би бодож байна." гэж хэлжээ. 

Тэрбээр Трампыг дэмждэггүй гэдгээ дурдаад "Нобелийн хороо нь түүний зан авирыг бус хийсэн зүйлсийг нь харж шийдвэрээ гаргах ёстой." гэж хэлжээ. 

Трамп энэхүү мэдээг тарсны дараа өөрийг нь нэр дэвшүүлсэн Норвегийн парламентын гишүүн Кристиан Тибрин-Геддед твиттер хуудсаараа дамжуулан талархал илэрхийлжээ.

Норвегийн улс төрч өмнө нь 2018 онд мөн Трампын нэрийг Умард Солонгостой харилцах харилцаанд шинэчлэл хийсний төлөө Нобелийн шагналд нэр дэвшүүлж байсан юм.

Одоогоос 13 сарын дараа дараагийн Нобелийн шагнал гардуулах ёслол болох юм. 

Нобелийн шагналд нэр дэвшигчдийг хэрхэн сонгодог вэ?

Үндэсний хэмжээний улс төрчид, олон улсын албаны хүмүүс, шинжлэх ухааны эрдэмтэн, судлаачид энэхүү шагналд нэр дэвших боломжтой байдаг.   

Шагналын эзэн Аравдугаар сард зарлагдаж, 12-р сард Норвегийн нийслэл Осло хотод шагнал гардуулах үйл ажиллагаа болно.

Нобелийн хороо өөрийн цахим хуудсанд 78 байгууллага, 223 хувь хүн Нобелийн Энхтайвны шагналд нэр дэвшсэн хэмээн мэдээлжээ. Мөн нэр дэвшигчдийн нэрсийг 50 жилийн дараа л ил болгодог хэмээн нэмж хэлсэн.

Ноён Трамп бол Ерөнхийлөгч Уильям Ховард Тафт, Ерөнхийлөгч Херберт Гувер, Ерөнхийлөгч Франклин Рузвельт зэрэг энхтайвны шагналд нэр дэвшсэн АНУ-ын хэд хэдэн ерөнхийлөгчийн нэг юм.

АНУ-ын нэр дэвшсэн Ерөнхийлөгчид дундаас 1906 онд Теодор Рузвельт, 1920 онд Вудроу Вилсон, 2002 онд Жимми Картер, 2009 онд Барак Обама нар тус тус Нобелийн шагнал хүртсэн байна. 

Эх сурвалж: BBC