Японы компаниуд иенийг долларт шилжүүлэх өртөг өссөнөөс болоод хохирч байсан юм. Ноён Курода коронавирусээс үүссэн тодорхойгүй байдал, шинэ зэх зээлүүдийн удаашрал зэргээс Японд асуудал үүссэнийг тэмдэглээд “Хасах хүү ба хөрөнгө худалдан авалт хязгаартаа хүрэх болоогүй” гэв. Тэрбээр “Бизнесүүд болон хэрэглэгчдийн итгэлийг сэргээхийн тулд бид биржээс хувьцаа худалдан авалтаа бараг хоёр дахин нэмсэн. Одоогийн нөхцөлд энэ нь хамгийн зөв бөгөөд үр ашигтай бодлого юм” хэмээн онцлов.

Гэвч зөөлөн бодлогыг өргөжүүлээгүй тул татвар, мөнгөний зохицуулалттай дэмжлэг, тэр ч бүү хэл бэлэн мөнгөний нийлүүлэлт хүлээж байсан зах зээлийн найдвар биелсэнгүй. Сингапур дахь "Aberdeen Asset Management" фирмийн менежер Майкл Моэн “Японы төв банк Засгийн газраас гаргах бондын хэмжээг нэмэгдүүлэх буюу бодлогын хүүг цааш нь багасгах арга хэмжээ аваагүй нь зах зээлийг гонсойлголоо” гэсэн юм. Тэрбээр “Хувьцаа худалдан авалт болон ам.долларын зээлийг өсгөх талаар өнөөдрийн зарласан арга хэмжээ инфляцад бодитойгоор нөлөөлөхгүй”-г тэмдэглэжээ.

Японы төв банк 2021 оны гуравдугаар сард хүрэх инфляцын төлөвөө 0.5 хувь байсныг 0.1 хувь болгон буулгасан боловч дараа жилийнхийг 1.7 хувь хэвээр үлдээжээ. Өмнөх жилийн зургадугаар сартай харьцуулсан үнэ 0.4 хувиар буурч, Японы эдийн засагт дефляци үргэлжилж байгааг харуулсан шинэ статистик гарсны дараа дээрх бодлогыг үргэлжлүүлэхээр шийдсэн байна. Инфляцын дарамт цаашид сулрах шинж ажиглагдаж байгааг хүнс ба эрчим хүчийг хассан хэрэглээний үнийн төвшин өмнөх сарын 0.6 хувьтай харьцуулахад 0.4 хувь болсноос харж болно.

Гэвч уг статистикт Японы эдийн засагт үндсэн өөрчлөлт гарсан гэх үзүүлэлт алга. Хэрэглээний татвар өссөн нь дотоодын зах зээлд цохилт өгч, Хятад зэрэг шинэ зах зээлийн удаашрал экспортод сөргөөр нөлөөлснөөс сүүлийн хоёр жилд бага өсөлттэй, зогсонги байдал хэвээр үргэлжилж байна. Таваарын үнэ унасан, иений ханш чангарсан болон хэрэглээний төвшин саарсан зэргээс инфляц сул байгаа юм. Зургадугаар сарын статистикаас үзэхэд хэрэглээ сул хэвээр, өрхийн бодит зарцуулалт өмнөх жилийн мөн үеэс 2.2 хувь доошилсон нь шинжээчдийн таамгаас бага байна.

Үүний зэрэгцээ Японы хөдөлмөрийн зах зээл уналтад орлоо. Баасан гарагийн мэдээлэлд ажилгүйдэл 1995 оноос хойших хамгийн их үзүүлэлт буюу 3.1 хувьтай байгааг дурдав. Ажил олдцын индекс 0.01 нэгжээр унаж, 1.37 болсон нь 25 жилийн доод үзүүлэлт юм. 2013 онд ноён Курода хоёр жилийн дотор инфляцыг хоёр хувь хүргэнэ хэмээн амлаж байсан боловч хоёр ч удаа зорилтот хугацааг өөрчилсөн. Төв банканд тулгарч буй одоогийн хамгийн том асуудал бол зорилтдоо хүрч чадах итгэл төрүүлэх хийгээд цаашдаа мөнгөний бодлогоо зөөлрүүлэх чадамжаа харуулах явдал болоод байна.

Эх сурвалж: Forbes