Саяхан Шинжаан мужийн гуч орчим насны Уйгар эмэгтэй нэгэн мэдээлэл өгсөн бөгөөд энэ нь цар тахлын улмаас олон тооны иргэдийг хөл хорионд байлгаж байхдаа харгис хэрцгий туршилтууд хийж байсан талаар ажээ.

Түүний хэлснээр тэднийг цөөн тоогоор өрөөнд хуваарилан хорьж байсан бөгөөд учир битүүлэг эм уулгадаг байсан гэнэ. Тэднийг эм ууж байх явцад нь цэргүүд харж, шалгадаг байсан бөгөөд эмийн бэлдмэлийг уусны дараа бие нь сулрах, толгой эргэх болон бөөлжих шинж тэмдэг үзүүлдэг гэнэ. Мөн түүнчлэн тэднийг долоо хоногт нэг удаа толгой, нүүрийг нь далдалж, учир битүүлэг шингэнээр шүршиж, халдваргүйжүүлдэг байсан гэнэ. Одоогоор бүсгүйн биеийн байдал тогтвортой байгаа бөгөөд гар хуруу нь шархалсан бөгөөд арьс нь бага зэрэг гуужиж байгаа ажээ.

Бүсгүй цар тахлын хорионоос гараад байгаа бөгөөд одоо гэрийн хорионд байгаа ажээ. Түүний биеийн байдал сайжирч байгаа бөгөөд, аюулгүй байдлаа бодож нэрээ зарлахаас татгалзсан гэнэ. Тэднийг хоригдож байх хугацаанд нийгмийн ажилтнууд ямар нэгэн лац, шошгогүй шилэн саванд савласан уламжлалт эмийг хүчээр уулгаж байжээ. Мэдээллийг хүлээж авсан ажилчидтай холбоо барьсан бусад уугуул иргэдийг илгээсэн зураг ч өнөөх эмийн зурагтай ижил байсан гэнэ.

Хятад улсын баруун хойд муж болох Шинжааны бүс нутагт цар тахалтай тэмцэх нэрийн дор маш чанга хатуу хөл хорионы дэглэм зарлаад байгаа юм. Ингэхдээ гэрийн хорио зэргээр хорих арга хэмжээ авч байгаа бөгөөд үүнийг зөрчсөн тохиолдолд 40 хоног баривчлах зэрэг арга хэмжээ авч байгаа юм.

Ингэхдээ хоригдсон иргэдэд хүчээр Хятадын уламжлалт эм, бэлдмэлүүдийг уулгах зэрэг арга хэмжээ авч байгаа талаар Шинжааны гурван ч иргэн мэдэгдээд амжсан. Хамгийн харамсалтай нь эдгээр эм нь цар тахлын эсрэг тийм ч үр дүнтэй биш бөгөөд мөн түүнчлэн Герман, Швецар, Америк зэрэг олон оронд эмийн бүтээгдэхүүнд хэрэглэхийг хориглодог хоруу чанар өндөртэй, карсиноген агуулсан эмүүд ч багтаж байгаа ажээ.

Шинжааны хамгийн сүүлийн хөл хорио 45 дахь өдөртөө үргэлжилж байгаа бөгөөд 7-р сараас хойш одоогийн байдлаар 826 тохиолдол бүртгэгдээд байгаа юм. Коронавирус анх илэрсэн Ухань хотоос илүү хатуу чанд хөл хориотой байгаа нь нөгөө талаар уг иргэдийг өөрсдийн эрх мэдэл, дарамтдаа байлгах гэсэн арга хэмээн олон улсын судлаачид буруутгаад байгаа юм. Хэдий Ухань хотод Шинжаантай ижил төстэй хэлбэрийн хөл хорио хийж байсан хэдий ч нэг ч иргэнд хүчээр эмийн бэлдмэл уулгах, эмчилгээний туршилт хийж байгаагүй юм.

Сүүлийн үед БНХАУ-ын хувьд цар тахлын байдал харьцангуй тогтворжиж ихэнх бүс нутаг, тэр бүү хэл Ухань хотод амьдрал эргээд хэвийн байдалдаа орж байгаа хэдий ч Шинжааны бүс нутгийн хувьд дэглэм хатуу чанга хэвээр байсаар байна. Сүүлийн гурван жилийн хугацаанд Шинжааны нэг саяас ч олон Уйгар, Казак иргэдийг янз бүрийн байдлаар хорьж, баривчилж байсан тохиолдол гараад байна.

Хятад улсын засгийн газар Шинжааны бүс нутгийг захиргаандаа байлгахын тулд сүүлийн олон жилийн турш ажиллаж байгаа бөгөөд тухай бүрд уугуул иргэд, Уйгар иргэд бослого, тэмцэл хийж олон ч удаа ширүүн мөргөлдөөн болсны эцэстээ Бээжингээс авч хэрэгжүүлж буй арга хэмжээнүүд нэлээд хурц хэлбэрт шилжиж эхлээд байна.

Эх сурвалж: AP News