АНУ-ын технологийн компаниудын хувьцааны ханш Европын эдийн засгийг давж гарлаа
АНУ-ын технологийн хувьцаанууд хөрөнгийн зах зээлийн түүхэн дээд амжилтанд хүрсэн бөгөөд одоо тус улсын техологийн салбар анх удаа Европын бүх хөрөнгийн зах зээлээс илүү үнэ цэнэтэй болсон гэж Америкийн Холбооны нөөцийн хамгийн сүүлийн үеийн судалгаа харуулж байна.
Банкны тэмдэглэлд АНУ-ын технологийн хувьцааны нийт зах зээлийн үнэлгээ 9.1 их наяд ам.долларт хүрсэн байна. Харин Европын бүх зах зээл, тэр дундаа Их Британи, Швейцарийг нийлүүлж тооцвол 8.9 их наяд доллараар үнэлэгдэж байгаа юм.
2007 онтой харьцуулж үзэхэд Европын зах зээл АНУ-ын технологийн салбараас дөрөв дахин том байсан аж.
Томоохон технологийн компаниуд зах зээлийг шинэ дээд амжилтанд хүргэхэд чухал үүрэг гүйцэтгэсээр байгаа тул энэ мэдээ гайхах зүйлгүй юм.
Гэхдээ энэхүү өсөлт нь АНУ-ын хөрөнгийн зах зээл цөөн тооны технологийн компанийн хувьцаанд улам бүр төвлөрч байгаатай холбоотой учраас үүнийг дагаж гарч ирэх асуудал улам бүр нэмэгдэж байна.
"Apple", "Microsoft", "Amazon", "Alphabet", "Facebook" гэсэн таван том компани "S&P 500" биржийн 23.8 хувийг дангаараа эзэлж байна гэж "S&P Dow Jones Indices"-ийн ахлах индекс шинжээч Ховард Силверблатт мэдээлэв.
Дээрх комданиуд нь өөрсдийн давуу эрхээ ашиглан зах зээлд өөрт ашигтай байдал үүсгэж байгаа гэж АНУ-ын засгийн газар үзэх болсон.
Ялангуяа "Google", "Apple", "Facebook", "Amazon" компаниудын гүйцэтгэх захирлууд анх удаа Конгрессийн сонсголд хамт оролцож, хууль тогтоогчдын асуултад хариулах болсон нь энэ байдлыг илтгэнэ.
Энэ нь эдгээр томоохон компаниудыг зах зээлд шударга бусаар өрсөлдөж, дангаар ноёлж байж болзошгүй гэж Конгрессийн гишүүд үзэж байгаагаас үүдэн шударга бус өрсөлдөөнийг хянан шалгах ажлын хүрээнд зохион байгуулагдаж байгаа ажил юм.
АНУ нь газрын тос, төмөр зам, банк санхүүгийн зэрэг салбаруудад хэн нэгэн дангаар ноёрхохоос сэргийлж ирсэн 100 гаруй жилийн түүхтэй. Гэвч энэ зохицуулалт нь өнөөдөр 21 дүгээр зууны технологийн аварга компаниудад хэрэгжих боломжгүй болоод байгаа юм.
"Apple"-ийн хувьцаа сүүлийн арван жилд "200 гаруй хувиар өсч, зах зээлийн үнэлгээг 2 их наяд ам.доллараас давсан АНУ-ын анхны компани болсон бол Амазоны хувьцаа энэ хугацаанд 2.700 хувиар өссөн байна.
Google компанийн хувьд сурталчилгаа, хайлтын системийн зах зээлд хэт давуу байдалтай болсон хэмээн сэжиглэгдэж байгаа. "Apple"-ийн хувьд "App Store" аппликэйшн дэлгүүртээ бусад хөгжүүлэгчдийн бүтээгдэхүүнд ялгавартай ханддаг гэсэн сэжиг бий.
Фэйсбүүк компани сүүлийн жилүүдэд "WhatsApp", "Instagram", "Giphy" зэрэг компаниудыг худалдан авч, хүчээ нэмсэн нь анхаарал татаж байна.
Амазоны хувьд өөрийн брэндүүдийг түлхүү борлуулж, гуравдагч үйлдвэрлэгчдийн бүтээгдэхүүнтэй шударга бус аргаар өрсөлддөг гэсэн яриа бий.
Эх сурвалж: Forbes
