Өнөө үед хиймэл дагуул нь бидний утасны дуудлага болон телевизийн сувгийн дамжуулалт зэрэг энгийн хэрэглээнд голчлон ашиглагддаг. Тийм ч учраас сүүлийн үед эдгээр нь хакеруудын сонирхлыг их татаад байна. Энэ сарын эхээр АНУ-д болсон “Black Hat USA 2020” чуулга уулзалтын үеэр энэ тухай асуудлууд нэлээд өргөн цар хүрээнд хэлэлцэгдсэн юм. Дүгнэлтээс үзэхэд бид хиймэл дагуулын хамгаалалтын системийг сайжруулах хэрэгтэй болоод байна.
“Black Hat USA 2020” оролцсон зочдын нэг болох Оксфорд Их сургуулийн Компьютерын шинжлэх ухааны салбар сургуулийн кибер аюулгүй байдлын докторант Жэймс Павур бид яагаад хиймэл дагуулын хамгаалалтыг сайжруулах шаардлагатай болохыг тайлбарлаж өгсөн юм. Мөн үүнийгээ бататгахын тулд тэрээр жишээ болгож хиймэл дагуулыг ашиглах боломжуудыг харуулсан бөгөөд ингэхдээ хэн бүхэн худалдаад авчхаж болохуйц 200 ам.долларын үнэтэй дижитал дүрс бичлэг дамжуулагч хиймэл дагуулын тохируулга, болон 90 ам.долларын үнэтэй хиймэл дагуулын тавган антен ашиглажээ. Тэрээр уг төхөөрөмжүүдийн тусламжтай Тунис улсын i.p хаяг ашиглан Польш улсын нэгэн томоохон үл хөдлөх хөрөнгө зуучлалын компанийн санхүүгийн тайланг ил болгосон юм. Дараагаар нь европын нэлээд томоохон үл хөдлөх хөрөнгө зуучлалын компанийн нууц мэдээллийг ч харуулж орхисон.
Павурын хэлснээр уг төхөөрөмжүүдийг интернетээс хүссэн бүхэн нь худалдан авах боломжтой бөгөөд аль нэгэн өөр улс, магадгүй өөр тивээс таны нууц мэдээллийг шалгаж, яриаг чинь чагнаж байх ч боломжтой гэв. Дэлхийн хэмжээний томоохон гүрэн, корпорацын ажилчид, мэргэжилтнүүд хэн ч байсан ердийн нэгэн кофе шоп-д бусадтай ярилцангаа маш чухал нууц мэдээллийг задруулах боломжтой юм. Харин энэ бүхнийг сансарын хиймэл дагуулын тусламжтай хакерууд олж мэдэх боломжтой. Тийм ч учраас томоохон корпорацууд нууц мэдээллээ бичгээр үйлдэж, дижитал хуулбар үүсгэдэггүй ажээ.
Павурын хэлэх гэсэн гол санаа нь задгай сансарт, хяналт багатай байдаг хиймэл дагуулыг хэн ч ашиглах боломжтой ажээ. Задгай сансарт байрлах хиймэл дагуулын тоо улам өсөх нь байдлыг бүр ч дордуулна. Одоогийн байдлаар 15000 давсан тоотой хиймэл дагуул тун удахгүй Элон Маскын “SpaceX” төслийн хүрээнд нэлээд хэдэн мянгаар нэмэгдэнэ. Энэ бүхэн нь цаашид мэдээллийн аюулгүй байдлын хувьд сул тал болж эхлэх юм. Тийм ч учраас Павур мэдээллийн нууцлалыг сайжруулах тал дээр ажиллаж эхэлж байгаа гэнэ. Тэрээр багийнхаа хамтаар мэдээлэл дамжуулахдаа мэдээллийн давтамж болон нууцлалыг өөрчлөх арга зохион бүтээж байгаа гэнэ.
Түүнээс гадна өмнө нь “DAPRA”-ын төслийн менежер байсан, одоо “Astrosec” компанийн гүйцэтгэх захирлын үүргийг хашиж буй Франк Паунд түүнтэй ижил саналтай байгаа бөгөөд илүү олон хиймэл дагуул сансарт хөөргөхөөсөө өмнө аюулгүй байдлын аргачлалыг бодож олох хэрэгтэй гэсэн юм. Тэрээр мөн: сансар огторгуйг цөөн хэдэн үлэмж хэмжээний корпорацуудын тоглоомын газар байлгахыг болиулах хэрэгтэй. Учир нь 30 ам.доллараар авсан гэрийн тавган антенаар хэн нэгэн нь уг талбарт нэвтрэх боломжтой. Үүнийг хэрхэн ашиглахыг бид таамаглашгүй. Тийм ч учраас бид кибер аюулгүй байдлыг сайтар бодолцон үзэж, хамгаалалтыг нь нэмэх хэрэгтэй. Хэрэв хэн нэгэн нь энэ бүхнийг ашиглаж муу зүйл хийхээр санаархаж буй бол бид тэдэнд саад болох хэрэгтэй гэсэн юм.
Эх сурвалж: Forbes
