АНУ-ын тусгай хүчинд алба хааж байсан Петер Деббинсийг ОХУ-д цэргийн тагнуулын чухал мэдээллүүдийг сүүлийн 10 жилийн турш дамжуулж байсан гэдэг үндэслэлээр баривчиллаа. АНУ-ын Хууль Зүйн Яамнаас мэдээлж байгаагаар түүнийг анх 2000-аад оны эхэн үед ОХУ-д хэд хэдэн удаа айлчлах үедээ тусгай ажилтантай холбоотой болсон бөгөөд улмаар элсүүлэгдэж “Икар Лесников” гэх нууц нэртэй болжээ. Уг үндэслэлийн улмаас 45 настай ахмад Петер Деббинсийг бүх насаар нь хорих ял төлөвлөөд байгаа гэнэ.

Деббинс Америк офицерийн хувьд тангарагаа зөрчиж, улс орноосоо урван, тусгай хүчний нууц мэдээллийг ОХУ-н тусгай албаны офицерт задруулж, улс орноо аюулд оруулж байсан. Тэрээр 10 жилийн хугацаанд байгууллагын бүтэц бүрэлдэхүүн, тусгай албадын гишүүдийн мэдээлэл болон  ОХУ-д тагнуулаар элсүүлж болохуйц АНУ-ын иргэдийн мэдээллийг илгээж байсан гэж Генерал Жон Демерс мэдэгджээ. Тэрээр мөн манай улс эр цэргүүд, албан хаагчиддаа гүн итгэж, итгэл хүлээлгэдэг. Харин тэр энэ итгэлийг улс эх орныхоо эсрэг зэвсэг болгон ашиглалаа гэв.

Ахмад Деббинсийн ээж нь ЗСБНХУ-д төрсөн бөгөөд энэ нь түүнийг хэд хэдэн удаа ОХУ-руу айлчилсан мөн тэдэнд урвах шийдвэр гаргахад нөлөөлсөн гэж үзэж байв. Деббинс 1990 онд Челябинск мужид томилолттой байх үедээ нэгэн Орос офицерийн охинтой танилцсан бөгөөд хожим түүнтэй гэр бүл болсон ажээ. Хэвлэл мэдээллийнхэн түүнийг “Оросын хүү” гэж нэрлээд байгаа юм, учир нь түүнийг төрсөн эх орноосоо илүү Москвад үнэнч байдал гаргасан гэдэг шалтгаанаар ингэж нэрлэх болсон юм.

Деббинс АНУ-ын тусгай хүчинд 1998 оноос 2005 оны хооронд алба хааж байсан бөгөөд химийн тусгай мэргэжилтэн байсан тэрээр ОХУ, Өмнөд Солонгос зэрэг орнуудад ажиллаж байсан байна. Дараагаар нь 2003 оноос Германд томилогдон тусгай хүчний ахмад болжээ. Жилийн дараа буюу 2004 онд Азербажантай холбоотой өндөр нууцлал бүхий баримтыг задруулснаар түүнийг сэжиглэж эхэлсэн бөгөөд 2005 онд албан тушаалаас нь түдгэлзүүлж, цолыг нь хураан авсан байна. Тэр үеэс хойш байцаалт авч байсан бөгөөд бүх асуудлыг тодорхой болгосон гэнэ.

Эх сурвалж: BBC