АНУ “Abbott Labs” компанийн “Covid-19”вирус илрүүлэх түргэн оношлуурыг олон нийтийн хэрэглээнд гаргахыг зөвшөөрлөө
“Abbott Laboratories” компани нэг бүр нь 5 ам.долларын өртөгтэй “Covid-19” вирусийг илрүүлэх зориулалттай түргэн оношлуурыг олон нийтийн хэрэглээнд гаргах зөвшөөрлөө АНУ-ын засгийн газраас авсан тухай өнгөрөгч лхагва гаригт мэдэгдлээ. Уг түргэн оношлуурыг эхний ээлжид сургууль болон ажлын байранд ашиглах боломжтой ажээ.
Америкийн хүнс болон эмийн хяналтын газраас “Abbott” компанийн “BinaxNOW Covid-19 Ag Card” гэх түргэн оношлуурыг одоо үүсээд байгаа нөхцөл байдлыг өөрчлөх чадвартай гэж үзэн маш богино хугацаанд зөвшөөрөл олгосон байна. Учир нь уг оношлуур нь 15 минутын дотор маш нарийвчлалтай хариу гаргадаг бөгөөд сургуулийн болон ажлын байранд ашиглах боломжтой, мөн зардал багатай учир өргөн хэрэглээнд тун тохирсон гэж үзэж байгаа ажээ.
Уг оношлуур нь банкны кредит карттай ижил хэмжээтэй бөгөөд хамар, залгиураас арчдаг авах шаардлагатай бөгөөд жирэмсний тесттэй ижил зарчмаар ажилладаг гэнэ. Уг оношлуурт ямар нэгэн нэмэлт хэрэгсэл, багаж шаардлагагүй бөгөөд маш богино хугацаанд хариуг харуулах нь халдвар авсан хэн нэгэн иргэн бусад хүмүүст халдвар тархаахаас сэргийлж чадна гэж үзэж байгаа юм.
Уг оношлуур нь “covid-19” вирусийг илрүүлэх хамгийн орчин үеийн технологи юм. Тэд анх энэ оны 3-р сард засгийн газраас оношлуур бүтээх зөвшөөрлөө авсан бөгөөд энэ хугацаанд тасралтгүй хөгжүүлсээр ирсэн байна. Анх тэдний бүтээсэн молекулын шинжилгээ хийх төхөөрөмж нь 30 минутын дараа хариу гардаг байсан хэдий ч тасралтгүй оролдлого, хөгжүүлэлт, шинэчлэлийн ачаар уг шинэ оношлуурыг гаргаж авсан байна.
Тэд удалгүй “BinaxNOW” оношлууртаа зориулж “Apple” болон андройд утасны үйлдлийн системд ажиллах боломжтой аппликэйшн гаргахаар ажиллаж байна. Ингэснээр хүндрэл багатайгаар маш олон сая хүнийг шинжилгээнд хамруулж, бодит үр дүнг харуулна гэж үзэж байгаа юм. Учир нь лабораторид өгсөн шинжилгээ нь маш өндөр мэдрэг чанартай бодис, төхөөрөмжийн тусламжтайгаар дэлгэрэнгүй, нарийвчилсан хариу гаргана. Гэхдээ ийм хариу авахын тулд тухайн хүн хэдэн өдөр хүлээх шаардлагатай болдог. Харин түргэн оношлуурын тусламжтайгаар тухайн иргэдийг маш богино хугацаанд халдвартай эсэхийг тодруулж, дараагаар нь тусгаарлах эсвэл үйл ажиллагааг нь үргэлжлүүлэх боломжтой болох юм.
“Abbott” компанийн удирдлагуудын мэдэгдсэнээр уг түргэн оношлуур нь энэ сарын сүүлээр үйлдвэрлэгдэж эхлэх бөгөөд 10-р сарын дунд үе гэхэд 50 сая хувийг хэрэглээнд нийлүүлнэ гэж тооцоолж байгаа ажээ.
Эх сурвалж: Forbes
