Амьсгалаас “Covid-19”-ын халдварыг шинжлэх боломжтой төхөөрөмж зохион бүтээжээ
Израиль улсын эрдэмтдийн баг хүний амьсгалаас маш богино хугацаанд “Covid-19” вирусийг илрүүлэх боломжтой төхөөрөмж зохион бүтээжээ. “NanoScent” гэх уг компани нь үнэрээр илрүүлэх технологид мэргэшсэн компани бөгөөд өмнө нь үхрийг хээлтэй эсэхийг нь мөн хүнийг хангалттай хэмжээний эрдэс бодис авч байгаа зэргийг нь ялгадаснаас гарах үнэрээр нь шинжих технологиудыг амжилттай зохион бүтээж байсан ажээ.
Тэд энэ туршлагаа олон нийтийн сайн сайхны төлөө, ашигтай зүйлс зориулахыг хүссэн тухай компанийн үүсгэн байгуулагч Орен Гавриэли, Эран Ром нар мэдэгдсэн байна.
“NanoScent” компанийн уг бүтээл нь хүний биеийн дулаан хэмжигчтэй ижил түргэн хугацаанд илрүүлэх чадвартай оношлуур ажээ. Уг оношлуураар шалгаж үзэхийн тулд шалгуулагч этгээд тусгай зориулалтын агаарын хүүдийрүү амьсгалах ёстой бөгөөд уг хүүдийг зориулалтын электрон, үнэр мэдрэх төхөөрөмжтэй холбосноор 30 секундийн дотор эерэг эсвэл сөрөг гэдэг хариу гарах ажээ.
Уг компанийн судалгаа хариуцсан захирал Орна Барашын мэдэгдсэнээр уг аргачлал нь маш оновчтой байх бөгөөд дээр нь өртөг зардлын хувьд тун боломжийн гэнэ. Тэдний гол зорилго нь маш богино хугацаанд вирусийг, оновчтой илрүүлэх ажээ. Хэрэв шалгуулагч этгээдийн хариу эерэг гарвал цаашид бусад төрлийн хэрэгслээр илүү дэлгэрэнгүй, нарийн судалгаа хийх хэрэгтэй болно. Гэсэн хэдий ч цар тахалд дасан зохицож амьдрах шаардлага үүсээд байгаа нөхцөлд олон нийтийн үйл ажиллагаа, нисэх буудал зэрэгт хамгийн түргэн шуурхай бөгөөд аюулгүй аргачлал нь энэ юм.
Зохион бүтээгчид энэ бүтээл ашиглалтад орсон даруй амьдралын хэвшил эргээд хэвийн байдалд орж болно гэж үзэж байгаа юм. Учир нь энэхүү оношлуурын тусламжтай нисэх буудлууд хэвийн ажиллаж, сургуулиуд үйл ажиллагаагаа эхлэх боломжтой болох юм.
Уг технологийг тун оновчтой болгох тал дээр одоо хэр нь ажилласаар байгаа юм. Гэсэн ч бүтээгчид тун найдлага өндөртэй байгаа бөгөөд учир нь бидний идсэн зүйлс, биед байдаг бактери болон “Covid-19”-ийн вирус зэрэг нь бидний амьсгалын үнэрийг мэдэгдэхүйц хэмжээгээр өөрчилж байдаг гэнэ. Гэсэн хэдийн ч эдгээр үнэрийг бидний үнэрлэх эрхтэн мэдрэх боломжгүй бөгөөд зөвхөн нохой эсвэл бусад маш үнэрч амьтад л тусгай сургуулилтын дараагаар үнэрлэж, ялгах чадвартай болдог гэнэ.
Эх сурвалж: Forbes
