“APPLE” анхны 2 их наяд ам.доллар давсан үнэлгээтэй компани болов
щ“Apple” компани 2020 оны 08-р сарын 19-ны өдөр нэгэн шинэ амжилт тогтоосон нь уг компани нь нийт хөрөнгийн үнэлгээгээр 2 их наяд ам.доллар давсан, АНУ-аас гаралтай анхны компани болсон юм. Тэд сүүлийн хоёр жилийн хугацаанд зах зээлийн өртгөө хоёр дахин нэмэгдүүлж чадсан юм.
“iPhone” утсыг зохион бүтээгчдийн хувьцааны үнэ 2020 оны байдлаар 55% нэмэгдээд байгаа бөгөөд өнгөрөгч гуравдугаар сарын 23-ны өдөр, цар тахлын улмаас үүссэн хөрөнгийн биржийн үнийн уналтаас хойш ноогдол ашгийг 106% нэмэгдээд байгаа ажээ. Одоогоор “Apple” компанийн нэгж хувьцааны үнэ 470 ам.доллар хүрээд байгаа бөгөөд “Wall Street”-ийн аналистууд цаашид ч өсөж 61% нэмэгдэх боломжтой гэж таамаглаж байгаа юм. Мөн “Bloomberg”-ийн мэдээллээс үзэхэд “Apple” компанийн хувьцаа бүх цаг үеийн хамгийн өндөр үзүүлэлтдээ хүрээд байгаа юм.
Мөн түүнчлэн “Apple” компани нь 2018 оны 08-р сарын 2ны өдөр буюу, одоогоос хоёр жилийн өмнө АНУ-аас 1 их наяд ам.долларын үнэлгээтэй болсон анхны компани болсон юм. Үүний дараагаар бусад компаниуд ар араасаа нэг их.наядын босгыг давж эхэлцгээсэн юм. Одоогоор зах зээлийн үнэлгээг “Apple” компани 2 их наяд ам.доллараар тэргүүлж байгаа бөгөөд үүний араас “Microsoft” (1,7 их наяд ам.доллар), “Amazon” (1,6 их наяд ам.доллар), “Google” толгой компани (1,1 их наяд ам.доллар), “Facebook” (761 тэрбум ам.доллар), компаниуд удаалж байгаа юм.
“Apple” компани уг үнэлгээнд хүрснээс зарим хөгжингүй орнуудын ДНБ-ээс давж гарсан юм. Эдгээр нь Итали, Бразил, Канад, ОХУ болон Өмнөд Солонгос зэрэг улсууд юм. Уг амжилтад хүрэхэд гол нөлөөлсөн хүчин зүйл нь цар тахал байсан бөгөөд маш олон хүмүүс тусгаарлалтад орж, гэрээсээ ажиллах, хичээллэх шаардлагатай болсон нь тэдний борлуулалтыг үлэмж нэмэгдүүлж, зөвхөн долдугаар сарын төгсгөлд гэхэд л 60 тэрбум ам.доллартай тэнцэхүйц бараа бүтээгдэхүүн борлуулаад байгаа юм.
Эх сурвалж: Forbes
