Германы авто машин үйлдвэрлэгч “Daimler AG” компани нь АНУ-ын зах зээлд борлуулсан дизель хөдөлгүүртэй тээврийн хэрэгслийн утааны хоруу нөлөөний талаарх хуурамч мэдээлэл тараасан хэрэгтэй холбоотой Америкийн Засгийн газраас ногдуулсан торгууль болон иргэдийн нэхэмжлэлийн дагуу 2.2 тэрбум ам.доллар төлөхөөр тохиролцоонд хүрсэн байна.

Тус улсын прокурорын газар одоогийн мөрдөгдөж буй экологийн шаардлагад тэнцэхгүй 684 мянган автомашин борлуулсан  “Daimler AG” компанийг хариуцлага алдсан гэж үзсэн нь торгох үндэс болсон байна.

АНУ-ын Засгийн газраас гаргасан мэдэгдэлд тус компани 2008 оноос хойш азотын исэл болон бусад хортой хаягдлын түвшин хэвийн хэмжээнээс илүү гарсан автомашиныг худалдаж байсан хэмээн мэдэгджээ.

“Daimler AG” засгийн газрын шийдвэртэй танилцсаны эцэст давж заалдахаас татгалзаж, торгуулийг төлж барагдуулахаар болсон байна.

Мөн тус компани Евро-5 стандартаар үйлдвэрлэгдсэн дизель хөдөлгүүртэй "Мерседес Бенз" автомашин эзэмшигчдэд яндангийн шүлтүүрийг нь сольж өгөхөд бэлэн гэдгээ Даймлер концерн зарласан ажээ.

Тус компаниас гаргасан мэдэгдэлд Америкийн хуулийн гүйцэтгэлийг хянадаг албадтай зарчмын тохиролцоонд хүрч чадсан гэж мэдэгдсэн байна. “Daimler AG” компани төрийн албадтай тохиролцоонд хүрч чадсан тул цаашид мөн экологийн байгууллагууд ба хувь хэрэглэгчдийн нэхэмжлэлүүдийг ч барагдуулах боломжтой болж байгаа юм. Иймд “Daimler AG” компанид үйлдвэрлэн АНУ-д борлуулсан хөнгөн ба ачааны машины утааг шүүх ба хянах системтэй холбоотой бүх нэхэмжлэлийг барагдуулах боломжтой болжээ.

АНУ-ын хуулийн хэрэгжилтийг хянагч байгууллагуудад торгууль гэж 1.5 тэрбум ам.доллар төлнө. Хэрэглэгчид ба экологийн байгууллагуудын хамтарсан нэхэмжлэлүүдийг барагдуулахад 700 сая ам.доллар төлөх юм байна. “Daimler AG” компани нь энэ бүх төлбөрийг барагдуулах санхүүгийн хангалттай боломжтой гэдгээ онцолжээ.

Үүнээс гадна ХБНГУ-ын эрх баригчид автомашин үйлдвэрлэгч “Volkswagen” компанид 1.2 тэрбум ам.долларын торгууль ногдуулахаар АНУ-ын шүүх төлөвлөж байгаа гэнэ. Прокурорууд тус компанийг 2007-2015 онд нүүрстөрөгчийн хийн ялгаруулалтыг буруу мэдээлж, хэрэглэгчид болон холбогдох албаныхныг залилсан гэж үзэж байгаа юм. Энэ хэрэгт ойролцоогоор 10 гаруй сая автомашин хамаарч байгаа аж. Өнгөрсөн онд АНУ-ын шүүхээс тус компанид мөн 4.3 тэрбум ам.долларын торгууль ногдуулах шийдвэр гаргаж байжээ.

Эх сурвалж: Reuters