Өмнөд Солонгос улсад өчигдөр буюу наймдугаар сарын 17-ны өдөр дахин нэг удаа коронавирусын олон тооны халдвар тархжээ. Өчигдрийн байдлаар нийт 379 шинэ тохиолдол илэрсэн бөгөөд ийм тооны тохиолдол илэрсэн удаа сүүлийн таван сард гараагүй юм.

Уг халдвар тархсан тохиолдол нь “Sarang Jeil” сүмийн цуглаантай шууд холбоотой гэнэ. Өмнө нь Солонгос улсад 5200 орчим хүнд халдвар тараасан тохиолдол ч гэсэн мөн “Shincheonji” сүмийн цуглаанд халдвартай иргэн оролцсоноос болсон билээ.

Уг халдварын тохиолдол нь өнгөрөгч бүтэн сайн өдөр 200 иргэн халдварласан нь илэрснээр эхэлсэн бөгөөд, өчигдөр нэмж 179 тохиолдол бүртгэгдсэн байна.

Үүний дараагаар Солонгос улсад халдвар авсан иргэдийн нийт тоо 15.5 мянган тохиолдол болж нэмэгджээ. Эдгээр шинэ халдварын тохиолдлуудын 312 тохиолдол нь “Sarang Jeil” сүмтэй холбоотой гэдгийг “Yonhap News” мэдээгээр Сөүл хотын захирагчийн албанаас мэдэгдсэн юм.

Уг сүмд цуглаанд явдаг 4000 иргэнээс 3400 иргэнийг хөл хорионд оруулаад байгаа бөгөөд эднээс 2000 орчим иргэнээс анхан шатны шинжилгээ аваад байгаа гэж Эрүүл Мэндийн Яамны дэд сайд Ким Ган Лип мэдэгдсэн юм. Түүний мэдэгдлээр сүмийн идэвхтэн, гишүүдийн баримт, бүртгэл ч бас сайн хийгдээгүй бөгөөд гишүүдийн мэдээллийг олох боломжгүй байгаа нь бусад халдвар авсан байж болохуйц иргэдийг илрүүлэхэд төвөгтэй болгож байна гэсэн юм.

Ерөнхийлөгч Мун Жэ Ин үүнийг “Shincheonji” сүмийн халдварын тохиолдлоос хойш гарсан хамгийн том заналхийлэл гэж нэрлэж байгаа бөгөөд олон нийтийн цугларсан ийм төрлийн ажиллагаанууд нь халдварт өвчтэй тэмцэхэд хүндрэл үзүүлж байгааг иргэддээ сануулсан байна.

Уг сүмийн тэргүүн Ли Ман Хи гэгчийг баривчилсан байгаа гэнэ. Түүнийг бүлгэмийн гишүүдийн мэдээлэл нууцалж, мөрдөн байцаах ажиллагаанд саад учруулсан гэдэг шалтгаанаар байцааж байгаа гэнэ. Гэсэн ч сүмээс гишүүд, дэмжигчдийн мэдээллийг нууцлаагүй гэж мэдэгдээд байгаа юм. Тэд уг асуудлыг үр дүнтэйгээр шийдэхийг хүсэж байгаа учир шаардлагатай мэдээлэл бүрийг холбогдох албаныханд өгнө гэдгээ мэдэгдсэн юм.

Уг “Sarang Jeil” сүм нь гишүүд дэмжигчдийн тоо зэрэг гэхээсээ илүүтэйгээр ахлах пастор Жун Кван Хунаар олон нийтэд танигдсан байна. Учир нь 63 настай уг эрхэм улс төрийн нэлээд хүчтэй шүүмжлэлүүдийг хэлдэг бөгөөд, одоогийн ерөнхийлөгч Мун Жэ Ин-ыг эсэргүүцэгч, шүүмжлэгч гэдгээрээ олонд танигдсан юм. Тэрээр өнгөрсөн амралтын өдөр болсон цуглаанд гэрийн хориог зөрчин өөрөө оролцсон гэсэн мэдээлэл байгаа ажээ. 

Уг үйлдлийг нь ерөнхийлөгч Мун Жэ Ин буруутгаж олон нийтийн аюулгүй байдлыг алдагдуулж, иргэдийн амь насанд заналхийлэл учруулсан гэж тэднийг шүүмжилж байгаа юм.

Эх сурвалж: BBC