Дэлхий дээрх ажлын байр хиймэл оюуны нөлөөтэй өөрчлөгдөж байна
Аж үйлдвэрийн хувьсгал бүхэн ажиллах шинэ нөхцөл байдал үүсгэж, өөрчлөлтөд оруулж байдаг. Одоо явагдаж буй дөрөвдүгээр хувьсгал буюу оюун ухааны хувьсгал ч мөн ялгаагүй олон өөрчлөлтийг ар араасаа дагуулсаар. Уг хувьсгалыг олон ч судлаачид, эрдэмтэд ойрын 10-аас 20 жилийн дотор явагдаж дуусна гэж үзэж байгаа юм. Тэгвэл эдгээр өөрчлөлтөөс хамгийн томоохон өөрчлөлт байж болохуйц гэж үзсэн таамгийг доор дурдъя.
Ихэнх ажил автоматчилагдах болно
Автоматчилал буюу хүний оролцоогүй, технологийн дэвшлийн хүчээр гүйцэтгэх төрлийн ажлууд маш эрчимтэй нэмэгдэж байгаа. Эдгээр нь ихэвчлэн үйлдвэрлэлийн технологиуд бөгөөд анхандаа үүнийг хүний ажил хөнгөвчлөхөөр бүтээж байсан ч одоо үед илүү нарийн технологи, хөгжил дэвшлийн ачаар илүү хямд төсөр, алдаагүй ажиллах болсон юм. Эдгээрийн нөлөөллийг судлахын тулд “PricewaterhouseCoopers” компани 29 оронд 200,000 орчим ажлын байран дээр судалгаа хийж үзээд дараах дүгнэлтэд хүрчээ.
- 2020 оны төгсгөл гэхэд нийт ажлын байрны 3 хувь нь автоматчилагдах болно
- 2020-иод оны төгсгөл уг тоо өссөөр 20 хувьд хүрнэ гэж үзжээ.
- 2030-аад оны дунд үед уг тоо 30 хувь давах бөгөөд тусгай мэргэшил шаардахгүй ажлын байрнууд бүрэн автоматчилагдах магадлал нь 44 хувь болтлоо өснө гэсэн тооцоолол гарчээ.
Гэхдээ үүнийг зөвхөн сөрөг үүднээс харах хэрэггүй бөгөөд ашигтай талыг нь харж үзвэл бидний хүнд хүчир ажил хөнгөрөхийн хэрээр өөр төрлийн ажлын байрнууд нэмэгдэх нь гарцаагүй юм. Ингэснээр хүн төрөлхтөн илүү дээр ажлын орчинтой болж, илүү ажиллах чадамжтай болох юм. Учир нь хүн төрөлхтний хувьд уйтгартай, залхмаар, эсвэл нэг үйлдлээ олон давтах төрлийн ажлуудыг робот болон хиймэл оюун даатгаж, бид илүү бүтээлч сэтгэлгээнд төвлөрсөн ажлуудыг гүйцэтгэдэг болох юм.
Хийгдэх ажлууд өөрчлөгдөнө
Хүн төрөлхтөн уйтгартай ажлуудаа роботод даатгаснаар илүү чөлөөтэй болох юм. Бид харилцан ярилцах, энэрэнгүй байдал, асуудал шийдэх зэрэг хиймэл оюунаас давуу талтай салбаруудад голлон төвлөрч ажилладаг болох юм. Өөрөөр хэлбэл бид ирээдүйд хүний элементэд тохирсон, “soft skill” шаардлагатай ажлуудыг илүү хийхээр болно.
Ажил олгогчдын нөхцөл өөрчлөгдөнө
Хэдийгээр техникийн давуу тал шаардлагагүй компаниудад ч гэсэн ажил олгогчдын хувьд нөхцөл байдал өөрчлөгдөх юм. Робот болон хиймэл оюуны бүтээлүүд ихэвчлэн үйлдвэрлэлийн үе шатанд ашиглагдах хэдий ч бид ирээдүйд ихэнх тохиолдолд хиймэл оюуны бүтээл ашиглах шаардлагатай болох юм. Мөн түүнчлэн хиймэл оюун болон роботын үйлдэл болон бүтээмжийг хянаж, нягталж байх ажлуудыг хүмүүс хийх нь ч дамжиггүй юм.
Олон эрдэмтдийн үзэж байгаагаар цар тахлын нөлөөнөөс үүсэлтэйгээр ихэнх ажилд заавал оффист сууж ажиллах шаардлагагүй болно гэж үзэж байна. Тэд цаашид ажилчид өөрийн хүссэн газраас ажиллах боломжийг бүрдүүлж өгнө гэж үзэж байна.
Эх сурвалж: Forbes
