Дэлхийн хоёр өнцөгт, хоёр өөр газар явагдсан судалгаа нэг ижил дүгнэлттэйгээр өндөрлөсөн байна. Энэ нь бага насны буюу 17 хүртэлх насны хүүхдүүд коронавирусын халдвар тархаах чадвар нь илүү өндөр байдаг ажээ.

АНУ-н Иллинос муж улсын Чикаго хотын хүүхдийн эмнэлэг болон Итали улсын Тренто хотын эмнэлгийн судалгаанууд саяхан хэвлэгдсэн бөгөөд гарсан үр дүн нь тун ижил байсан юм.

Чикаго хотын эмнэлгийн мэргэжилтнүүд хүүхэд болон насанд хүрэгчдийн амьсгалын зам, хамар, салст, залгиурт коронавирусын төвлөрөл хэр их байгааг судалжээ. Судалгааны үр дүнгээс үзэхэд халдвар авсан 5 нас хүртэлх хүүхүүд насанд хүрэгчидтэй харьцуулж үзэхэд маш хөнгөн өвчилж байсан хэдий ч тэдний халдвар тархаах чадвар нь насанд хүрэгчдээс 10 дахин илүү байсан гэнэ.

Халдвар авсан бага насны хүүхдүүд найтаах, ханиах, хашгирах зэрэгт их хэмжээний вирус агаарт цацагддаг бөгөөд эдгээр нь насанд хүрэгчдийнхтэй харьцуулахад халдварлуулах эрсдэл нь 10-аас 100 дахин илүү байсан гэнэ. 5 наснаас 17 нас хүртэлх хүүхдүүдэд вирусын төвлөрөл насанд хүрэгчидтэй ижил хэмжээнд байсан хэдий ч тархаах чадвар нь 5 хүртэлх насны хүүхдүүдтэй ижил маш өндөр байсан ажээ. Гэхдээ эдгээр хүүхдүүд өөрсдөө халдвар авсан тохиолдолд өвчин хүндрэлгүй, маш хөнгөн тусаад өнгөрч байгаа гэнэ.

Эдгээр судалгааны дүнгээс үзэхэд бага насны хүүхдүүд халдвар авах эрсдэл нь насанд хүрэгчдээс бага бөгөөд, халдвар авсан тохиолдолд хөнгөнөөр өвдөж, илүү хялбар эмчлэгдэх боломжтой байгаа юм. Гол асуудал нь халдвар авсан бага насны хүүхдүүд бусад 30 настай насанд хүрэгчидтэй харьцуулахад халдвар тараах боломж нь хамгийн багадаа хоёр дахин их байсан юм. Мөн түүнчлэн цөөнгүй тохиолдлын идэвхигүй хэлбэрийн тээгчид ч байгаа ажээ.

Энэ судалгааны дараагаар судалгаа хийсэн талууд аль аль нь ирэх хичээлийн жилийн нээлт эхлэх үед өвчнийг улам тархаахгүйн тулд сайтар тооцоолох хэрэгтэй гэж мэдэгдээд байгаа юм. Учир нь бид хэдий хүүхдүүдийг цаг ямагт амны хаалт хэрэглүүлж, бие биедээ тоглоом, хоол хүнс зэргийг дамжуулахгүй байх зэргийг үүрэг болгосон ч алдаа эрсдэл гарахгүй байх баталгаа байхгүй юм.

Мөн бага насны хүүхдүүд насанд хүрэгчдээс илүүтэйгээр вирус тархаах чадвартай учир хичээл сургууль нээх нь нэг талдаа маш том эрсдэл болж байгаа ажээ.

Эх сурвалж: Forbes