Энэ оны эхээр задгай сансарт ажиллаж байсан нэгэн сансрын нисгэгчид аминд эрсдэлтэй нөхцөл байдал үүссэн юм. Уг сансрын нисгэгчийн хүзүүний орчимд цус нөжрөлт үүсэж, цусны урсгалыг хаах эрсдэл үүссэн байна. Азаар аврах хөлгөөр яаралтай газардан, эх дэлхий дээр бууж ирсний дараа чадварлаг эмч нарын баг шуурхай ажиллаж амийг нь аварсан билээ.
Гэхдээ энэ азтай байдал хэр олон удаа давтагдах вэ? Тийм ч учраас эрдэмтэд болон эмч нарын баг задгай сансарт ажил үүргээ гүйцэтгэж байгаа сансрын нисгэгчдийн амь нас, эрүүл мэндийг хангах үүднээс хэрхэн мэс ажилбарыг татах хүчгүй орчинд хийх талаар бодсоор байна. Сүүлийн үед маш олон томоохон компани, сансрын агентлагууд Ангараг гараг дээр хүн буулгах талаар эрчимтэй ажиллах болсон энэ үед хөлгийн багийн эрүүл мэндийн байдлыг хангах нь нэн чухал ажлуудын нэг болсон юм.
Задгай сансарт тохиолдсон шиг түргэн тусламжын баг өвчтний биеийн байдлыг тэнцвэржүүлж, дэлхийд газардсаны дараа мэс ажилбар хийх зэрэг сонголт энэ үед огт боломжгүй юм. Ингэж явах нь их цаг зарцуулахаас гадна орчны хүнд нөлөөлөл, даралт, цацраг туяа, жингүйдэл зэрэг маш олон асуудалтай нүүр тулах болно.
Сансарт гарсны дараа нисгэгчдийн цусны эс, цусны даралт, зүрхний хэм өөрчлөгдөж, биеийн шингэний эргэлт, яс болон булчингийн чадвар мууддаг. Мөн халдвар авах эрсдэл ч өндөр болоод ирдэг. Тиймээс сансарт мэс ажилбар хийх нь маш сөрөг талтай байж ч болох юм. Тийм ч учраас мэс ажилбар шаардаж болох хамгийн түгээмэл жишээнүүд болох гэмтэл, мухар олгойн үрэвсэл, шээсний замын үрэвсэл зэрэг нь сансрын аялалын хувьд амь насанд хүрч болох маш хүнд нөхцөл юм.
Эдгээр бүх эрсдэлийг давж, сансарт мэс ажилбар хийх туршилтууд одоо ч явагдсаар байгаа хэдий ч гагцхүү хүн дээр бодитоор хийж амжаагүй байгаа аж. Жишээ нь хархны тасарсан сүүлийг эмчлэх мөн түүнчлэн дурангийн тусламжтай хэвлийн дотор хэсэгт тусгай багажын тусламжтай бичил хэмжээний татах хүч үүсгэж мэс ажилбар амжилттай хийсэн байна. Тийм ч учраас энэ аргачлалыг хөгжүүлж цаашид хүн дээр мэс ажилбар хийх талаар тооцоолж байгаа аж. Зөвхөн мэс засалд орж буй өвчтөнөөс гадна мэс заслын багаж, мэс засалчдыг ч гэсэн тусгай зориулалтын татах хүч бүхий өрөөнд тусгаарлах зэрэг инновацын шийдлүүд яригдаж байгаа аж. Мэс заслыг ч гэсэн хэвлийн хөндий нээх байдлаар биш дурангаар маш жижиг цоолон мэс ажилбар хийх аргыг илүүд үзэж байгаа гэнэ.
Биеийн шингэн татах хүчний нөлөөгөөр бас өөрчлөгддөг бөгөөд судсаар урсах цусны тогтмол байдал алдагдах нь мэдээ алдуулалттай мэс заслыг улам эрсдэлтэй болгодог байна.
Судлаачид олон төрлийн мэс заслын төхөөрөмжүүд бүтээсэн бөгөөд одоо ихэнх хэсэг нь туршилтын шатандаа яваа юм.
Эх сурвалж: Independent
