Энэхүү мэдэгдлийн дагуу томоохон банкнууд үйлчлүүлэгчдийн криптовалютыг хадгалахаас гадна тэдний хувийн нууц нэр, түлхүүр үг зэргийг авч үлдэх эрхтэй болж байгаа юм. 

Валют хяналтын албаны гаргасан мэдэгдлийн дагуу тухайн дансыг нээсэн банк эзнийх нь криптовалютын нууц үгийг хадгалж үлдэх ёстой гэнэ. Учир нь криптовалют нь өөрөө хийсвэл зүйл учраас найдвартай баталгаа гаргахын тулд ийм алхам хийх ёстой болжээ. 

Криптовалют бол өндөр нууцлал бүхий цахим тооцооны хэрэгслийн нэг хэлбэр юм. Гэхдээ доллар, евро, иен зэрэг валютаас ялгаатай нь криптовалютыг аль нэг улсын төв банк эсвэл санхүүгийн байгууллагаас гаргадаггүй бас хэвлэдэггүй. Криптовалютын цахим гүйлгээ, төлбөр тооцооны аюулгүй байдал нууцлалыг хангахад криптограф ашигладаг. Энэ бол тодорхой мэдээллийг тайлахад хэцүү код болгон хөрвүүлэх процесс юм.

Дэлхийн хоёрдугаар дайны үед нууц мэдээллийг шифрлэх хэрэгцээ шаардлагын дагуу криптограф бий болсон юм. Харин цахим эринд математик онолын элементүүд болон компьютерын тусламжтайгаар криптограф цахим мэдээлэл, харилцаа холбоо болон мөнгөний нууцлал, аюулгүй байдлыг хангах аргачлал болоод байна.

Хамгийн анхны цахим мөнгө биткойныг 2009 онд нэр нь үл мэдэгдэх программчин эсвэл бүлэг программчид Сатоши Накамото хэмээх зохиомол нэрийн дор зохион бүтээсэн. Биткойн гарсан цагаас хойш өнгөрсөн хугацаанд 1000 гаруй цахим мөнгө бий болсон. Биткойны ханш Зул сарын баярын өмнө 30 хувиар буурахын өмнө 20,000 ам.долларт хүрсэн билээ. Зарим цахим арилжааны бүлгүүд биткойны ханш энэ онд 50,000 ам.долларт хүрнэ гэж мөрий тавьсан юм. Блокчейн технологийг үндэслэгчид биткойныг 2030 гэхэд бүр 500,000 ам.долларт хүрнэ гэж таамагласан.

Биткойн өнгөрсөн арав шахам жилийн хугацаанд Ethereum, Ripple, IOTA, Dash, Litecoin, Namecoin, MintChip зэрэг олон өрсөлдөгчидтэй болсон. Биткойны бусад өрсөлдөгчдөөсөө ялгарах онцлог нь хамгийн анхны цахим мөнгө бас блокчейн технологи дээр суурилсан нь юм. Гэвч олон улсын банк санхүүгийн байгууллагууд биткойныг төлбөр тооцооны албан ёсны хэрэгсэл гэж үзэхгүй байсаар ирсэн.

Харин энэхүү шийдвэр нь дээрх ойлголтыг өөрчөхөд том нөлөө үзүүлэх нь тодорхой юм. 

Валют хяналтын албаны дарга Брайн Брүүкс "Бид ийм алхам хийж байж данс нээлгэсэн хүмүүсийн хөрөнгийн найдвартай хадгалж чадна. Криптовалютын данс нээлгэж байгаа хүмүүс дор хаяж хэдэн мянган ам.доллар хадгалуулах учраас ямарваа нэгэн алдаа гаргах эрх байхгүй" гэж хэлсэн байна. 

Мэдээж хэрэг криптовалют арилждаг хүмүүс өөрсдийн цахим хэтэвчинд мөнгөө хадгалдаг хэдий ч банкнууд илүү найдвартай хамгаалалт санал болгоно гэж шинжээчид үзэж байгаа юм. 

Криптовалютын гүйлгээ эрхэлдэг "Gemini", "Anchorage"зэрэг компаниуд энэхүү шийдвэр нь эерэг үр дүн авч ирнэ гэдэгт итгэлтэй байгаа аж. 

"Anchorage"-ын захирал Нэйтэн Маккэйли "Энэ бол ёстой нүдээ олсон шийдвэр. Криптовалютын зах зээлд төрийн зүгээс оролцож эхэлснээр бидэнд өмнө нь тулгарч байсан олон саад бэрхшээл арилах болно. Гэхдээ мэдээж уламжлалт арга барилаар үүнийг зохицуулж болохгүй учраас бид албаны хүмүүстэй хамтарч ажиллахад бэлэн байна" гэж мэдэгдсэн байна. 

Эх сурвалж: Forbes