Иргэд дотоодын аялал жуулчлалыг сэргээснээр коронавирусын халдварын тохиолдлууд нэмэгдэнэ хэмээн эмээж байгаагаа онцолжээ. Тодруулбал, иргэд Ерөнхий сайд Шинзо Абэгийн 16 тэрбум ам. долларын төсөвтэй дотоодын аялал жуулчлалаа сэргээх "Go To" аян нь эрүүл мэндийн тогтолцоо муутай бүс нутгуудад коронавирусын халдвар тархах эрсдэлийг нэмэгдүүлнэ гэж үзэж байгаа аж. ЭнЭйчКей сувгаар мэдээлж байгаагаар өнгөрсөн ням гарагт Японд коронавирусын 500 гаруй тохиолдол бүртгэгджээ.

Харин нийслэл Токио хотод өнгөрсөн бямба гарагт 280 гаруй тохиолдол бүртгэгдсэн бол ням гарагт энэ тоо буурч, 188 тохиолдол бүртгэгджээ. Өнгөрсөн өдрүүдэд тус улсад бүртгэгдсэн коронавирусын халдварын тохиолдлуудын тоо өнгөрсөн 5-р сард Японы засгийн газраас коронавирусын цар тахлыг хяналтандаа авах зорилгоор тогтоосон онц байдлын дэглэмээ цуцалж байсан үеийн үзүүлэлтээс өндөр байгаа билээ. Асахи сонингоос утсаар авсан санал асуулгад оролцсон иргэдийн 74 хувь нь дотоодын аялал жуулчлалыг сэргээхийн эсрэг байр сууриа илэрхийлсэн бол Никкэй сонингоос явуулсан санал асуулгад оролцсон иргэдийн 80 орчим хувь нь дотоодын аялал жуулчлалыг сэргээхэд эрт байна хэмээн хариулжээ.

Коронавирусын халдвар тархсан бусад улс орнуудтай харьцуулахад Японд цөөн тохиолдол бүртгэгдэж, халдвар хурдацтай тархаагүй ч нийслэл Токиод шинэ тохиолдлууд нэмэгдсэнтэй холбоотойгоор иргэдийг сонор сэрэмжтэй байхыг анхааруулаад байна. Шинзо Абэгийн засгийн газраас санаачилсан "Go To" аяны хүрээнд хүн ам цөөнтэй бүс нутгууд дахь аялал жуулчлалаас хамааралтай бизнесүүдийг сэргээх зорилгоор тус бүс нутгуудад аялж буй иргэдийн аяллын зардлыг 50 хүртэлх хувиар хөнгөлөх тухай тусгажээ.

Эх сурвалж: Reuters