Коронавирусын халдварын голомт илэрсэнтэй холбоотойгоор БНХАУ-ын нийслэл Бээжин хотод атуу хөл хорио тогтоожээ.
Өнгөрсөн ням гарагт Хятадын эрх баригчдын мэдээлснээр Хэбэй мужийн Аньсин тосгонд хатуу хөл хорио тогтоосон ба хөл хорионд 500 мянга орчим хүн хамрагдаж байгаа аж. Аньсинд тогтоосон хөл хорионы дэглэм нь коронавирусын халдварын анхны голомт болсон Ухань хотод тогтоосонтой адил байх ба гэр бүлийн нэг гишүүнд өдөрт нэг удаа гарч, дэлгүүр эсвэл эмийн сан орохыг зөвшөөрөх аж. Бээжин хотоос өмнө зүгт 150 км зайд байрлах Аньсин тосгонд 2 долоо хоногийн өмнө Бээжинд коронавирусын халдварын тохиолдол огцом нэмэгдсэн явдлаас хойш нийт 18 тохиолдол бүртгэгджээ.
Коронавирусын цар тахлын хоёр дахь давалгаанаас сэргийлэхийн тулд Хятадын эрүүл мэндийн салбарын мэргэжилтнүүд коронавирусын тохиолдол бүрийг хянаж байгаа ба өнгөрсөн 24 цагт Бээжинд коронавирусын халдвар авсан 14 тохиолдол бүртгэгдээд байна. Аньсинаас гадна Бээжинтэй ойролцоо байрлах зарим бүс нутгуудад мөн хорио цээрийн дэглэм тогтоож, иргэдийн шилжилт хөдөлгөөнийг хязгаарлаж, олноор нь коронавирусын шинжилгээнд хамруулах ажил явагдаж байна. 6-р сарын дундуур Бээжингийн хүнсний захад коронавирусын халдварын голомт гарахаас өмнө Бээжинд 57 хоногийн турш дотоодын халдвар илрээгүй билээ.
3-р сарын эхээр БНХАУ-д коронавирусын халдвар авсан 80 мянга орчим тохиолдол бүртгэгдсэнээс хойш тус улсад нэмж ердөө 4700 халдвар бүртгэгдсэн юм. Хятадын бусад мужуудад халдварын тохиолдол 10-аас хэтрэхгүй байгаа ба дийлэнх нь гаднаас зөөвөрлөгдөн ирсэн тохиолдлууд байгаа билээ.
Эх сурвалж: BBC
