Аялал жуулчлал 2022 он гэхэд аюул багатай болох уу?
Та 2022 онд аялж зорьсон газартаа ирж байна гээд төсөөл дөө? Онгоцноос буух үед чинь робот хөтөч таныг тосож биеийн дулаан хэмжигч лазер багажаараа мэндчилнэ. Мэдээж хэдэн цагийн өмнө нислэгтээ суух үед ч ижил шалгалт авах болно. Энэ цар тахал нь хүн төрөлхтний аялал жуулчлалын аргачлалыг үндсээр нь өөрчлөх болно.
Амьсгалын замын үзлэг хийлгэхээр ирэх үед бүсийн ажилчид танд амьсгалын зам шалгах бичил чип бүхий капсул өгөх болно. Яг л согтууруулах ундааг илрүүлэх үед замын цагдаа нарын ашигладаг шиг, гол ялгаа нь энэ багаж нь далд хэлбэрийн тээгч буюу өөрөө өвдөхгүй ч бусдад халдварлуулах боломжтой хүнийг шалгаж илрүүлнэ. Та капсулд шүлсний дээж өгч түүнийгээ бяцхан цахилгаан соронзон бүхий төхөөрөмжид шалгуулна. 30 секундийн дараа төхөөрөмжийн ногоон гэрэл асах үед та пасспортоо аваад цааш аялалаа үргэлжлүүлэхээр гарч одно.
Энэ технологи танд уран зөгнөл мэт л санагдах байх, гэвч зөвхөн одоохондоо л тэгж санагдаж магадгүй. Энэ оны эхэнд аялж явсан бол та зарим нисэх буудлуудад зөөврийн дулаан хэмжих багаж ашиглаад эхэлсэн байсныг анзаарсан байх. Дулаан хэмжигч ашиг тустай ч яг ч үүргээ төгс биелүүлж чадахгүй юм. Хүмүүс ямар ч шалтгаанаар халуурсан байх боломжтой. Шинж тэмдэг илрээгүй ч халдвар тараах боломжтой биетийг илрүүлэхийн тулд тухайн хүний шүлсийг шинжилж үзэх ёстой.
Тийм л учраас амьсгалын замыг шалгах төхөөрөмж хэрэг болно. Та үүнийг одоохондоо харж амжаагүй л байх, харин энэ төхөөрөмж Израиль улсын Негевьд байрлах Бен-Гурион их сургуулийн профессор Габби Саруси-гийн фотоны лабораторид бий болчихсон. Ковид-19 вирусийн огцом дэгдэлтийн үед бүх л газар маш оновчтой илрүүлэгч төхөөрөмжийг түргэн хугацаанд бүтээх шаардлагатай болсон. Харин Саруси асуудлыг өөр өнцгөөр харж байлаа. Физикч хүний хувьд тэрээр Коронавирусын биетийг тусгалан бүтээсэн цахилгаан төхөөрөмжөөр шалгаж болох тухай бодож үзэжээ. Шинжилгээний дээжийг цахилгаан соронзон бүхий оронд нэвтрүүлсэнээр үүсгэвэр биетийг илрүүлэх боломжтой болсон байна.
Түүний тайлбарласнаар:
Бид шинжилгээний капсулыг соронзон орноор идэвхжүүлсэн спектр хэмжигчээр шалгах болно. Хэрэв коронавирусын биет байх юм бол бид түүнийг нь илрүүлэх боломжтой гэжээ. Түүний багийнхан аль хэдийн одоо авч байгаа шинжилгээний аргуудтай харьцуулан 150 өвчтөнөөс шинжилгээ авч туршилт хийхэд хариу нь 92% буюу маш алдаагүй илрүүлж байна.
Бусад хүлээн зөвшөөрөгдсөн шинжилгээнүүд маш бага хувьтай байхад энэ бол маш өндөр тоо юм гэж Саруси нэмж хэлжээ. Бүтээлийн ажил дуусах үед Иргэний Нисэхийн Ерөнхий газраас үүнийг ашиглаж эхлэх зөвшөөрөл өгөх байх гэж тэрээр найдаж байна. Учир нь энэ төхөөрөмж аялал жуулчлалыг эргэж хөл дээр нь босгох боломжтой.
Мэдээж хүн бүрийн санааг амраах өөр нэгэн зүйл нь бол вакцин. Мэргэжилтнүүдийн үзэж байгаагаар 2021 он гэхэд вакциныг нээх боломжтой аж. Аялал жуулчлалын томоохон орнууд шар хумхаа гэх мэт өвчний вакцин хийлгэсэн эсэхийг нягталж үздэг бол цаашид коронагын вакцин хийлгэсэн эсэхийг нэмж шалгадаг болох биз. Вакцины тухайд Массачусетсийн Технологийн Институтийн судлаач Ана Жакленек хэлэхдээ уг вакцин нүдэнд харагдахгүй ч төхөөрөмжөөр шалгаж болохуйц бичил цаасан хэлбэртэй байна гэж онцолжээ. Уг аргыг нь аль хэдийн батлагдаад байгаа бөгөөд хүнтэй төстэй арьсны бүтэцтэй амьтад дээр туршилтууд маш амжилттай явагдсан байна.
Түүний тодорхойлсноор маш нарийн зүүгээр вакцин болон үл үзэгдэх бэхийг арьсанд шахах бөгөөд энэ нь цаашид төхөөрөмжөөр шалгуулахад баталгаажуулалт болж өгөх юм гэжээ.
Уг зүү нь сорви үлдээхгүй бөгөөд бидний одоо хэрэглэж буй зүүнээс илүү нарийн байна, та шархны наалт наалгаж байгаа юм шиг л юу ч мэдрэхгүй аж. Тусгайлан тохируулсан ухаалаг утсаар ч вакцин хийлгэсэн эсэхийг шалгаж болох учир хэрэглэхэд тун хялбар гэж үзээд байгаа юм.
Паспортоо авсны дараагаар гадаадын иргэн харьяатын тусгай ажилтан таныг угтаж авна. Харин одоо тээшээ шалгуулах цаг ирлээ. Ажилтан танд эко гаралтай Велес цэвэршүүлэх бодис цацахыг зөвлөх болно. Одоогийн байдлаар Велесийг гэр ахуйн цэвэрлэгээний бодисын зориулалтаар үүсээд байгаа юм. Гэсэн ч цаашид илүү хөгжүүлэхээр багууд ажилласаар байгаа юм.
Таныг цэвэрлүүлсэн тээшээ аван таксинд суугаад явж байх үед нислэгийн онгоцыг ч гэсэн ухаалаг төхөөрөмжийн тусламжтай халдваргүйжүүлэлт хийх болно. Анагаах ухааны доктор Артур Крайтенберг хүү Эллиот Крайтенбергийн тусламжтай Боенг 737 болон төсөөтэй загварын онгоцнуудыг 5 хүрэхгүй минутад халдваргүйжүүлэх ЖермФалкон төхөөрөмжийг бүтээсэн байна.
Түүний хэлснээр онгоцыг нисэх болон буух үед нь 5 минутын турш уг төхөөрөмжийг ашиглах хэрэгтэй гэнэ. Ийм байдлаар бид коронавирусын аюулыг 99% устгаж чадна гэж мэдэгдээд байгаа юм.
Уг төхөөрөмж нь хэт ягаан туяаны зарчмаар ажилладаг бөгөөд мөн түүнчлэн зарим нэг хэрэгцээт төхөөрөмжүүд ч уг аргачлалыг ашиглахыг зорьж байгаа юм. Үүний нэг жишээ нь ухаалаг утас болон бусад жижиг төхөөрөмжийг халдваргүйжүүлэгч.
Та таксинд сууж яваад зочид буудалруугаа залгаж, захиалгаа шалгахыг хүссэн ч утас чинь бохирдолтой эсэхэд санаа зовно. Тиймээс та утсаа гаргаж ирэн халдваргүйжүүлэх ФөүнСөүп төхөөрөмждөө хийх болно. Уг төхөөрөмжийг коллежийн найзууд болох Дэниэл Барнес болон Весли ЛаПорте нар бүтээжээ. Тэд анх 2009 онд хүмүүсийн утас нийтийн бие засах газрын суултуурнаас илүү бохирдол, халдвар тээдэг гэдэг тухай олж мэдэж уг төхөөрөмжийг бүтээж эхэлсэн байна. Тэд төхөөрөмжөө хөгжүүлсээр бактери болон вирусийг 99.9% устгах чадвартай болтол нь хөгжүүлсэн байна.
Та утсаа ариутгасны дараа санаа амар аялахаар цааш явна.
Аялал жуулчлал 2022 оноос эхлэн төвөгтэй санагдаж магадгүй ч илүү цэвэр илүү аюулгүй байдалтай болох нь дамжиггүй.
Эх сурвалж: BBC
