Австрийн засгийн газрын мэдээлснээр энэ оны арван нэгдүгээр сар гэхэд Гитлерийн төрсөн Австрийн Браунау ам-Инн дахь байшинг нураасны дараа оронд нь цагдаагийн газар байгуулах болно гэсэн байна. Ийм аргаар засгийн газар нео-нацистуудыг уг газраас холдуулах зорилготой байгаа аж.
Австрийн Дотоод хэргийн сайд Карл Нойхаммер барилгын шинэ зургийг танилцуулахдаа: "Олон хүнийг алсан дарангуйлагчийн төрсөн газар шинэ амьдралыг эхлүүлэх болно", хэмээжээ.
Гитлер эх нутгаа Вена хот гэж үздэг байсан тул Браунау дахь байшингийнхаа тухай сонирхдоггүй байсан. Гэхдээ түүний орчин үеийн шүтэн бишрэгчид жил бүр Гитлерийн төрсөн өдрөөр тэнд үйл ажиллагаа зохион байгуулж саатуулагдсанаар дуусдаг байв.
2017 онд өөрийгөө Харальд Гитлер гэж нэрлэсэн 25 настай эрийг нео-нацизмыг алдаршуулсан хэмээн эрх баригчид шүүхэд өгсөн. Тэрбээр өөртөө сахал нааж Бранаугийн өмнө зургаа авахуулж олон нийтийн сүлжээнд байршуулж байсан юм.
Нураах уу шинэчлэх үү?
Нео-нацистуудыг мөргөл үйлдэхийг нь зогсоохын тулд байшинг яах вэ гэсэн хэлэлцүүлэг дөрвөн жил үргэлжилсэн.
Барилгын 12 байгууллага оролцсон уралдаанд Marte.Marte компани шалгарсан. Уг байгууллагын танилцуулсан төлөвлөгөө нь гадна фасадыг өөрчлөх мөн шинэ дээвэр барих аж. Энэхүү төлөвлөгөө нь 2023 онд дуусах бөгөөд 5 сая еврогийн өртөгтэй байх гэнэ.
Байшингийн үүдэнд “Энх тайван, эрх чөлөө, ардчиллын төлөө. Фашизмд үгүй гэж хэл. Сая сая үхсэн хүмүүс бидэнд үүнийг сануулж байгаа", гэсэн бичигтэй дурсгалын чулуу байдаг.
"Гол санаа нь энэ байгууламжийг бүхэлд нь саармагжуулах явдал юм" гэж Австрийн Дотоод хэргийн яамны хэвлэлийн төлөөлөгч Герман Финер сэтгүүлчдэд ярьжээ.
Байшингийн дэргэдэх дурсгалт чулууг яах нь тодорхойгүй байгаа. Зарим хүмүүс энд Гитлерийг сануулах ямар нэгэн зүйлийг үлдээж болохгүй, тийм учраас Вена хотын музейд уг чулууг өгөх хэрэгтэй хэмээсэн. Гэхдээ нутгийн түүхчийн үзэж байгаагаар уг хөшөөг Браунау дахь музейд үлдээх нь зүйтэй.
Байшингийн хувь заяа
Адольф Гитлер 1889 онд Зальцбургер-форштадт дахь 18 зуунд баригдсан 3 давхар байрнуудын нэгэнд төрсөн, гэвч тэндээ бараг амьдраагүй, учир нь түүний гэр бүл өөр байр луу нүүж, 3 жилийн дараа хотоос явсан юм.
Браунау дахь уг байшинг 1952 оноос эхлэн нэгэн гэр бүл хязгаарлагдмал боломжтой иргэдэд номын сан, сургууль болгон түрээсэлж байсан ч 2011 оноос уг байр хоосорсон аж.
2016 онд засгийн газраас уг байшинд ёс бус үйл ажиллагаа зохион байгуулагдахаас сэргийлж улсын өмч болгосон.
Сүүлийн эзэн нь уг барилгыг зарахаас татгалзсанаас хойш засгийн газар албадан чөлөөлөх тушаал гаргасан. Шийдвэрийн хүчинтэй байдлыг Австрийн Үндсэн хуулийн шүүх баталсан байна. Эзэмшигчдэд 812 мянган евро төлсөн ба уг үнийг мэргэжилтнүүд үнэлгээгээр гаргасан аж.
Дайны дараа Гитлерийн засаглалтай холбоотой бусад барилгуудыг нураасан. Нацистын дарангуйлагчийн зуслан "Бүргэдийн үүр" (Kehlsteinhaus) нь одоо ресторан, жуулчны чиглэлээр үйл ажиллагаагаа явуулдаг бол Польш дахь цэргийн төв байр болох "Чонын үүр" (Wolfsschanze) нь зочид буудал болжээ.
Эх сурвалж: bbc.com
