БНХАУ-ын засгийн газар АНУ-ын агаарын тээврийн компаниудын онгоцнуудыг хүлээж авахаас татгалзсантай холбоотойгоор АНУ-ын засгийн газар мөн адил Хятадын агаарын тээврийн компаниудын онгоцуудыг Америкийн хилээр нэвтрүүлэхгүй хэмээн мэдэгджээ.

АНУ-ын Тээврийн яамнаас мэдээлж байгаагаар БНХАУ-ын агаарын тээврийн компаниудад тавьж буй тус хориг энэ сарын 16-наас үйлчилж эхлэх ч Ерөнхийлөгч Доналд Трамп хүсвэл уг хориг үүнээс ч өмнө хэрэгжиж эхлэх боломжтой аж. Америкийн Юнайтед Эйрлайнс болон Дельта Эйр Лайнс компаниуд Хятадаар дайран өнгөрөх нислэгүүдээ 6-р сарын 1-нээс эхлэн сэргээх хүсэлт гаргасан ч БНХАУ-ын засгийн газар олон улсын нислэгтэй холбоотой хийгдсэн зөвшилцлийг зөрчиж, дээрх агаарын тээврийн компаниудын онгоцуудыг одоог хүртэл хүлээж авахгүй байгаа хэмээн АНУ-ын Тээврийн яамнаас мэдэгджээ.

Юнайтед Эйрлайнс болон Дельта Эйр Лайнс компаниуд коронавирусын цар тахалтай холбоотойгоор Хятад руу хийх, Хятадаар дайран өнгөрөх нислэгүүдээ цуцлаад байсан ба АНУ-ын засгийн газраас мөн адил коронавирусын халдварын тархалтаас сэргийлэх үүднээс агаарын тээвэрт хязгаарлалт тогтоосон байсан юм. АНУ-ын Тээврийн яам, “Хятадын агаарын тээврийн салбарын удирдлагууд Америкийн агаарын тээврийн компаниудын өмнө нь үйлдэж байсан нислэгүүдийг сэргээхийг зөвшөөрөөгүй.

Бид АНУ, БНХАУ аль аль нь байгуулсан хамтын гэрээнийхээ дагуу эрхээ эдлэх боломжтой болох хүртэл Хятадын талын түншүүдтэйгээ холбогдож асуудлыг хэлэлцэнэ. Тэр болтол БНХАУ Америкийн талаас хэдэн нислэг зөвшөөрнө, бид яг тэр тоотой тэнцэх Хятадын нислэгийг зөвшөөрөх болно.” хэмээн онцолжээ.

Эх сурвалж: CNN