1 Өмнөд Солонгост коронавирусийн шинэ тохиолдол бүртгэгдсэнгүй
Пүрэв гаригт Өмнөд Солонгос нь 2-р сараас хойш анх удаа коронавирусийн тохиолдол гараагүй гэж мэдээлэв гэж халдварт өвчин хянах, урьдчилан сэргийлэх төв мэдээлэв.
Одоогийн байдлаар тус улсын хэмжээнд 10,765 тохиолдол бүртгэгдээд байгаа юм. Харин амиа алдсан иргэдийн тоо 247-оор нэмэгдэж 9,599-д хүрээд байгаа юм.
Иргэд хөл хорионы дэглэм сайн барьж эрх баригчид үүргээ сайн биелүүлж байгаа учраас ийнхүү халдварын тархалтыг барьж чадлаа хэмээн шүүмжлэгчид үзэж байгаа аж.
Эх сурвалж: Reuters
2 Япон улс хөл хорионы дэглэмээ сунгаж магадгүй
Японы Ерөнхий сайд Шинзо Абэ пүрэв гарагт халдварт өвчний мэргэжилтнүүдтэй уулзаж коронавирусийн тархалтыг хязгаарлах үүднээс тогтоосон хөл хорионы хугацааг сунгах асуудлаар хуралджээ.
Абэ 4-р сарын 16-нд улс даяар онц байдал зарласан бөгөөд энэ нь 5-р сарын 6-ны өдөр хүртэл үргэлжлэх юм.
Шинзо Абэ энэ талаар "Би мэргэжилтнүүдтэй зөвлөлдсөний эцэст шийдвэрээ гаргах болно. Хэрвээ бид шийдвэрт хүрч чадвал хөл хориог 6-р сарын 5 хүртэл сунгах бодолтой байгаа" гэж хэлсэн байна.
Эх сурвалж: Nippon
3 Орос улсад коронавирусийн халдвар авсан хүмүүсийн тоо 100 мянгыг давлаа
ОХУ-д коронавирусийн халдвар авсан иргэдийн тоо 100 мянга давсан болохыг тус улсын эрүүл мэндийн яамнаас мэдээлжээ.
Хэдийгээр Ерөнхийлөгч Владимир Путин 3-р сарын сүүлчээр хөл хорио тогтоох тушаал гаргасан ч энэ нь төдийлөн үр дүнгээ өгөөгүй бололтой.
Одоогийн байдлаар халдвар авсан иргэдийн тоо 106,498-д хүрээд байгаа бөгөөд сүүлийн 24 цагийн дотор 101 хүн нас барж нийт нас барсан хүний тоо 1,073 болжээ.
Эх сурвалж: ТАСС
4 Герман улс "Хезболл"-г террорист бүлгэм хэмээн нэрлэв
Герман улс Ираны дэмжлэгтэй "Хезболла"-гийн үйл ажиллагааг хориглож, түүнийг террорист байгууллага хэмээн зарласан тухай Дотоод хэргийн яамнаас пүрэв гаригт мэдэгдэв.
Мөн цагдаа нар Герман дахь дөрвөн хотод байрлах тус бүлэглэлтэй холбоотой сүмүүдийг хаасан байна. Аюулгүй байдлын албаныхан ХБНГУ-д 1,050 орчим хүн "Хезболла" бүлгэмд элссэн гэдэг тоо баримтыг дурджээ.
Дотоод хэргийн сайд Хорст Сехофер өөрийн биеэр "Хезболла"-гийн үйл ажиллагааг хориглосон гэж хэвлэлийн төлөөлөгч мэдэгдэв.
Эх сурвалж: Reuters
5 Дональд Трамп хөл хориог сунгахгүй
Ерөнхийлөгч Дональд Трамп Лхагва гаригт холбооны засгийн газар коронавирусийн хөл хориог сунгахгүй гэдгээ хэлсэн бөгөөд түүний хүргэн, зөвлөх Жаред Кушнер 7-р сар гэхэд тус улс хэвийн байдалдаа орсон байна хэмээн мэдэгджээ.
Трамп ирэх долоо хоногоос эхлэн Аризона мужаар аялах төлөвлөгөөтэй байгаагаа зарлаж ирэх саруудад олон мянган дэмжигчдийн хамтаар олон сонгуулийн кампанит ажил зохион байгуулна гэж найдаж байна гэж мэдэгдсэн байна.
Эх сурвалж: AP news
6 Нью Йорк хотод ачааны машинуудаас 100 орчим цогцос олджээ
Лхагва гарагт Нью Йоркийн нэгэн оршуулгын газрын зогсоол дээрээс 100 орчим цогцос ачсан гурван хөргөгчгүй ачааны машин олдсон байна. Тус газрын ойр орчимд амьдардаг хүмүүс ачааны машинуудаас эвгүй үнэр гарч байгааг цагдаад мэдээлснээр энэ тэдгээр цогцоснуудыг илрүүлсэн аж.
Одоогийн байдлаар тэдгээр машинууд хэн эзэмшдэг талаар цагдаа нар мэдэгдээгүй байна. Тус хотод коронавирусийн нөлөөгөөр нас барсан хүмүүсийн тоо огцом нэмэгдэж байгаа учраас оршуулах газар хүртэл олдохгүй болж байгаа юм.
Эх сурвалж: AP news
7 Өмнөд Солонгосын Иньчонь хотын барилгад дэлбэрэлт болж 38 ажилчин нас баржээ
Өмнөд Солонгосын Иньчонь хотод баригдаж буй барилгад гал гарч улмаар 38 иргэн нас баржээ. Амь хохирсон иргэд бүгд тухайн барилгад ажиллаж байсан ажилчид гэх мэдээлэл байна. Гал гарах үед тус барилга дээр 78 хүн ажиллаж байсан бөгөөд одоогоор 38 ажилчнийг илрүүлээд буй ч, энэ тоо нэмэгдэх хандлагатай гэнэ.
Тус улсын ерөнхий сайд Чун Сё Кюн хэлснээр тухайн барилгад осолдсон хүн тус бүрд туслах шаардлагатай тоног төхөөрөмж, боловсон хүчнийг дайчлах болно хэмээн мэдээлсэн аж. Урдьчилсан дүгнэлтээр тус гал нь шатамхай бодисоос үүдэлтэй томоохон дэлбэрэлтээс болсон гэв.
Эх сурвалж: BBC
8 Исанийн нэгэн наран шарлагын газрыг цайруулагчаар "ариутгажээ"
Испанийн эргийн амралтын газрын эрх баригчид хүүхдүүдийг коронавирусаас хамгаалахын тулд наран шарлагын газрыг цайруулагчаар цацсаны дараа уучлал гуйжээ.
Кадизийн ойролцоох Захара де лос Атунес компани хөл хорио тавигдахаас нэг өдрийн өмнө 2 км наран шарлагын газрыг "ариутгах" үүднээс цайруулах уусмалаар шүршсэн байна.
Байгаль орчны мэргэжилтнүүд энэхүү алхам нь орон нутгийн экосистемд "асар их хохирол учруулсан" гэж мэдэгджээ. Испанид коронавирусийн улмаас 23,800 хүн нас бараад байгаа юм.
Эх сурвалж: CNN
9 Коронавирусийн халдвараас эдгэсэн хүний тоо 1 сая давлаа
Дэлхий дахинд нэг өдөрт коронавирусийн 80.300 шинэ тохиолдол бүртгэгдэж, нийт халдвартай хүний тоо 3.216.808 боллоо. Мөн нэг өдөрт 6439 хүн нас барж, улмаар нийт нас барагсдын тоо 227.906 болоод байна. Одоогоор 1.000.113 хүн эдгэрчээ.
Нэг өдөрт хамгийн олон бүртгэгдсэн шинэ тохиолдол, нас баралт тоогоор АНУ тэргүүлжээ. Тус улсад нэг өдрийн дотор 27.586 шинэ тохиолдол илэрч, 2.352 хүн нас барсан байна.
10 Францын эдийн засаг агшив
Францын ДНБ 2020 оны эхний улиралд 5.8 хувиар буурсан нь коронавирусээс үүдэлтэй гэж үндэсний статистикийн агентлаг Пүрэв гаригт мэдэгдэв.
Үүнээс болоод тус улсын эдийн засаг албан ёсоор хямралд орлоо гэж Үндэсний статистикийн агентлаг "INSEE" мэдээлэв.
Хамгийн сүүлд 1968 оноос хойш байнгын өсөлттэй байсан Францын эдийн засаг ийнхүү анх удаа агшиж байгаа юм.
Эх сурвалж: Sputniknews
