Орост амьдарч буй гадаадын иргэд тус улсын давхар иргэншлийг авах боломжтой болжээ
Хоёр долоо хоногийн өмнө ОХУ-ын парламентад төсөл болон танилцуулагдсан иргэншил солих тухай шинэ хуулийг Владимир Путин баталсан байна.
Баасан гарагт ОХУ-ын ерөнхийлөгч Владимир Путин тус улсын гадаадын иргэн харьяатын бодлогыг эрс өөрчилсөн хуулийг баталжээ. Ингэснээр ирэх долдугаар сараас хойд хөршид амьдарч буй гадаадын иргэд өөрийн орны иргэншлээс заавал татгалзах шаардлагагүйгээр ОХУ-ын иргэн болох эрх нээгдэж байна.
Олон сарын турш энэхүү өөрчлөлтийн тухай санал, хэлэлцүүлгүүд явагдсан бөгөөд энэ сард ажил хэрэг болж, Төрийн Думд танилцуулагдсанаас хойш 17 хоногийн дараа хүчин төгөлдөр болж байгаа нь энэ аж.
Уг шинэ хууль нь тус улсын харьяат болох хүсэлтийг боловсруулах ажиллагааг хялбар болгохын зэрэгцээ цаашид 10 сая шинэ иргэнийг хүлээн авах бодлогыг хэрэгжүүлэхэд томоохон тус дэм болохыг "Коммерсант" сонин мэдээлжээ.
Ялангуяа уг өөрчлөлт нь Оросын иргэнтэй гэр бүл болсон хүмүүсийн иргэншлийн асуудлыг багасгаж байгаа аж. Тухайлбал Оросын иргэнтэй гэрлэж, хүүхэдтэй болсон гадаад хүн харьяат болохын тулд дор хаяж 5 жил тус улсад амьдарсан байх шаардлагыг 3 жил болгож, түүнчлэн орлогын эх сурвалжаа батлах хэрэггүй болсон байна.
Мөн Молдав, Украин, Беларус, Казахстан улсын иргэд Оросын харьяат болохын тулд тус улсад амьдардаг байх шаардлагагүй, шууд иргэншил авч болохыг шинэ хуульд тусгажээ.
Эх сурвалж: Russia Today
