Берлин-Москва-УБ чиглэлийн онгоцоор ирсэн 6 хүнээс коронавирус илрэв

Анхны тохиолдол: Москва-Улаанбаатар чиглэлийн онгоцоор гуравдугаар сарын 2-нд УБ-т газардсан Франц иргэнээс коронавирус илрэв.

Удаах тохиолдол: Сөүл-УБ, Берлин-УБ-ын тусгай үүргийн онгоцоор ирсэн 3 иргэн гуравдугаар сарын 17-ны өдрийн 20 цагт эхний шинжилгээний хариугаар Ковид-19 халдвар авсан нь тогтоогдов.

Сүүлийн тохиолдлууд: Гуравдугаар сарын 16-нд Берлин-Москва-Улаанбаатар чиглэлийн тусгай үүргийн онгоцоор ирж ХӨСҮТ-д тусгаарлагдсан 6 хүнийг коронавирусийн халдвар авсан болохыг ээлж дараалан тогтоов.

Нийт: 10 тохиолдол

Итали улс коронавирусийн нас баралтын тоогоор Хятадыг давав

Баасан гаригт Итали улсад коронавирусийн улмаас нас барсан хүний тоо 627-оор нэмэгдэж нийт 4,032-т хүрэв. Ингэснээр нас баралтын тоогоор халдварын анхны голомт болох Хятад улсыг гүйцэж, дэлхийн хамгийн их эндэгдэлтэй улс болов.

Ийнхүү Италид нөхцөл байдал хурцадсанаар тус улсын Ломбарди мужийн Бергамо хотод морг болон цогцос чандарлах үйлчилгээ эрхэлдэг байгууллагууд ачааллаа дийлэхээ больж, бусад хотуудаас туслалцаа хүсэж эхлэв.

Ази тивд халдварын хоёрдахь давалгаа үүсэж болзошгүйг анхааруулав

Ковид-19 халдварын тархалт Европ руу чиглэж, тус тив дэгдэлтийн шинэ төв болсон. Гэвч Ази тивд шинэ коронавирусийн хоёр дахь давалгаа үүсч болзошгүйг эрдэмтэд анхааруулав.

Учир нь өвчлөл Европ тивээс Ази руу зөөвөрлөгдөн орж ирж байгаа нь дахин тархалт үүсэх эрсдэл бүрдүүлсэн байна. Жишээ нь, Сингапур улсад 33 шинэ тохиолдол, БНХАУ-д 140 гаруй шинэ тохиолдол Европын орнуудаас зөөвөрлөгдөж орж ирсэн аж.

Коронавирусийг эдгээх боломжтой ханиадны эмийг олж илрүүлэв

Японы Fujifilm компанийн охин компанийн үйлдвэрлэсэн “Фавипиравир” хэмээх ханиадны эм коронавирусийн халдвартай хүмүүсийг эмчлэхэд сайн үр дүнтэй байгааг Хятадын шинжлэх ухаан, технологийн яамны төлөөлөгч Жан Шинмин мэдэгдэв.

Хятад улс уг эмийг Ухань, Шэнжэнь хотуудад нийт 340 өвчтөн дээр туршихад уг эмийг уусан өвчтөнүүд дунджаар дөрөв хоногийн дараа бүрэн эдгэрч байна гэв.

Нэгдүгээр бүлгийн цустай хүмүүст коронавирусийн халдвар хөнгөн тусаж байгааг тогтоов

Хятадын эрдэмтэд Ухань, Шэнжэнь хотуудын 2,000 гаруй өвчтөний мэдээллийг боловсруулж, тус хотуудын эрүүл хүмүүсийн өгөгдөлтэй харьцуулан судалгаа хийхэд Ковид-19 вирусийн халдвар А (II) бүлгийн цустай хүмүүст илүү хүнд тусаж байгаа бол O (I) бүлгийн цустай хүмүүсийг хөнгөн хэлбэрээр өвчлүүлж байгаа болохыг олж тогтоожээ.

Ингэснээр “А бүлгийн цустай хүмүүсийг халдвараас хамгаалахад илүү анхаарал тавьж чадвал коронавирусийн тархалтыг бууруулах боломжтой” гэж үзэж байгаагаа Уханий Их сургуулийн Жоннань эмнэлгийн тэргүүлэх судлаач Ван Шинхуань мэдээлэв.

Коронавирусийн тархалтаас сэргийлж АНУ-ын шоронгууд хоригдлуудаа суллаж эхлэв

Анагаах ухааны мэргэжилтнүүд шоронгийн хоригдлууд нь шинэ коронавирусийн халдвар авах, дамжуулах өндөр эрсдэлтэйг анхааруулсан.

Үүний улмаас хэд хоногийн өмнө Лос Анжелес, Кливланд хотуудад хэдэн зуун хоригдолыг сулласан бол өчигдөр Нью Йорк хотын шоронгууд халдварын эмзэг бүлэгт багтах хоригдлуудаа суллахаар болсныг тус хотын захирагч мэдэгдэв.

Коронавирус бол “Дэлхийн II дайнаас хойш улс оронд маань тохиолдсон хамгийн хүнд сорилт”

Герман улсын канцлерь Ангела Меркель телевизээр өрийн ард иргэддээ хандаж үг хэлэхдээ “Энэ бол бид бүгдийн ноцтой авч үзэх ёстой асуудал. Манай улс үндэстний хувьд хоёр Герман нэгдсэнээс хойш ч биш, бүр дэлхийн хоёрдугаар дайнаас хойш тохиолдож байгаа хамгийн хүнд сорилт юм. Тиймээс бидний эв нэгдэл юу юунаас илүү чухал” хэмээн мэдэгдэв.

Хятадад хоёр өдөр дараалан дотоодын гаралтай халдвар илэрсэнгүй

Пүрэв гарагт Хятадын эх газарт коронавирусийн халдварын 39 тохиолдол бүртгэгдсэн нь бүгд гадаадаас зорчин ирэгсдээс илрэв. Тиймээс гадаад орнуудаас зөөвөрлөгдөж ирсэн халдварын тохиолдол нийтдээ 228 болж, тус улс гадаадаас ирж буй хүмүүсийг заавал 14 хоног тусгаарлах болов.

Харин дотоодын гаралтай халдвар хоёр өдөр дарааллан бүртгэгдсэнгүй.