3-р сарын 12 ны өдөр биткоин өөрийн үнийн 25% алдаж оройдоо бага зэрэг өссөн ба бусад төстэй тоон активууд ч ойролцоо уналттай байсан байна. Жишээ нь эфириум 23% ($143 хүртэл), биткоин кеш (Bitcoin Cash) —30% ( $179), лайткоин (Litecoin) - 23% ( $36) болж хямдарчээ. Энэ бол Coinmarketcap-ын мэдээ.

Энэ байдал нь дэлхийн санхүүгийн зах зээл дээр болж буй ихээхэн хэмжээний уналттай бас холбоотой. Өнгөрсөн 4 дэх өдрийн худалдаагаар АНУ, Европ, Азийн голлох биржийн индексүүд огцом унасан билээ.

12 ний өдрийн байдлаар Шанхайн SSE Composite 1,52%, Японы Nikkei — 4,41%, Францын CAC 40 12,3%, Английн FTSE 100 - 10,9%, Германы DAX - 12,2%-иар тус тус буурсан байна.

Америкийн индексүүд нь худалдаа эхлэх үед:  Dow Jones 7.2%, S&P 500 —  7.98%, өндөр технологийн NASDAQ —  7.03% тус тус унасан байдаг. Ийм огцом уналтаас зайлсхийж худалдааг зогсоосон нь нэг долоо хоногт хоёр дахь удаагаа болж байгаа тохиолдол бөгөөд иймэрхүү нөхцөл байдал өмнө нь санхүүгийн хямралын үед л болж байсан юм.

Хөрөнгийн бирж дээрх сандарч тэвдсэн байдал нь коронgвирусын тархалттай холбоотой бөгөөд ДЭМБ нь уг вирусийн халдварыг тахлын хэмжээнд хүрлээ хэмээн мэдэгдсэн билээ.

Үүнээс гадна дэлхийн зах зээл дээрх нефтийн үнийн уналт нь мөн л нөлөөлсөн юм. Пүрэв гаригnayн худалдаагаар Brent маркийн нефтийн үнэ 6,8% хямдарсан буюу 33,3 $/ баррель болсон бол өмнөх 9 ний өдөр нефтийн үнэ бараг 33% унасан нь 1991 оноос хойших хамгийн том уналт байжээ. 10 нд бага хэмжээгээр эргэн өссөн ч дараагийн өдөр нь дахин унасан байдаг.

Нефтийн зах зээл дээрх энэ тогтворгүй байдал нь ОПЕК+ холбоо задарсантай холбоотой ба 3-р сарын 6 ны өдөр энэ холбооны улс орнууд нефть олборлолт бууруулах тал дээр тохиролцож чадаагүй учир өмнө хүлээсэн бүх үүргээсээ татгалзсан юм. ОПЕК+ингэж амархан задарна гэж хэн ч тооцож байгаагүй учраас бүх зах зээлд энэ нь том цохилт болсон ба харин алтны үнэнд онцгой нөлөөлөөгүй байна.

Дэлхийн санхүүгийн ирээдүйн байдал тодорхойгүй болж ирэх үед хөрөнгө оруулагч нар алт ихээр худалдан авч хөрөнгөө хамгаалж эхэлдэг. Сонирхолтой нь 2020 оны эхээр зарим мэргэжилтнүүд биткоин энэ үүргийг гүйцэтгэж болох тухай ярьж байсан билээ. АНУ Ираны хоорондох 1-р сарын хямралын үеэр хөрөнгийн биржүүдийн индекс унаж байхад криптовалют нь алттай адил өсөж байсан юм.

“Өмнө нь электрон активыг өнөөгийн санхүүгийн системийг орлож болох боломж гэж хөрөнгө оруулагч нар үзэж байсан боловч одоо байдал өөрчлөгдлөө. Криптовалют нь бусад өндөр эрсдэлтэй валюттай адил болж хувирсан бөгөөд зах зээл хямарч эхлэх үед хамгийн түрүүнд зарах ёстой зүйлийн нэг болжээ” гэж тоймчид ярьж байна.

Өсөлтийг хүлээх нь

Олон мэргэжилтнүүд биткоин болон бусад криптовалютын үнийг удаан хугацаагаар уналтын байдалтай байхгүй, аажмаар өсөж эхэлнэ гэж хүлээж байна. Хаврын төгсгөлд эдгээр валютын үнэ нэлээд өсөх ба энэ өсөлт нь ойрын үед 5-10% байх болов уу гэсэн таамаг бий. Хэрвээ ямар нэг онцгой зүйл болохгүй бол криптовалют аажмаар тогтвортой өссөөр байх ба үүнд шинээр гарах либра (Libra) болон грам (Gram) гэсэн шинэ валютууд тодорхой хэмжээгээр нэмэр болох биз ээ.

“Хятадын засаг захиргаа нь өвчний оргил үе өнгөрсөн гэж мэдээлсэн учир удалгүй короновирусийн нөлөө гэдэг зүйл үгүй болж криптовалютад үзүүлж байсан нэг том дарамт суларч эхэлнэ.  Ийм учраас дундаж хугацааны үнэлгээгээр биткоин нь 13-14 000$ болох магадлал өндөр байна”.