2012 онд Монгол Улсын Засгийн газар “Эрдэнэс Таван Толгой” ХК-ийн нийт хувьцааны 20 хувь болох гурван тэрбум ширхэг хувьцааг мөн оны дөрөвдүгээр сарын 11-нээс өмнө төрсөн иргэн бүрт үнэ төлбөргүй эзэмшүүлэхээр болсон. Ингэснээр нэг иргэнд 1072 ширхэг хувьцаа ногдсон билээ.

Тэгвэл Эрдэнэс Таван Толгой ХХК өнгөрсөн онд 1 их наяд 30 тэрбум төгрөгийн цэвэр ашигтай ажиллаж , улмаар тавдугаар сарын 1-нээс иргэн бүрт хувьцааны ногдол ашиг тараахаар болсон. Ингэхдээ нэгж хувьцаанд 90 төгрөг олгож, 1072 хувьцаатай иргэд 96,480 төгрөгийн ногдол ашиг хүртэхээр болоод байгаа юм.

Тэгвэл:

-Нэг иргэнд 96,480 төгрөг олгож аманд ч үгүй, хамарт ч үгүй үрснээс тухайн төсвөөрөө уул уурхайн төмөр зам барих бүтээн байгуулалтад зарцуулахыг зарим хүмүүс уриалаад байгаа. Учир нь 1 тонн нүүрс хил дээр очих зардал 30$ гаруй байгаа бол уул уурхайн төмөр зам тависнаар 8$-т очих боломжтой юм байна.

+Тэгвэл эсрэг талын байр суурийн үзэж буйгаар Эрдэнэс таван толгой бол хувьцаат компани. Хэрвээ хувьцаат компани ашигтай ажилласан бол хувьцаа эзэмшигчиддээ ногдол ашиг тараах нь зүйн хэрэг. Эрдэнэс таван толгойн хувьцааг ард иргэд үнэгүй эзэмшсэн ч, тухайн үед нэрлэсэн үнээр нь хувьцааг худалдан авсан ААН-үүд байгаа. Тиймээс зөвхөн хувьцаат компани гэсэн нэр төдий байхаас татгалзаж, эхлээд ядаж нэг удаа жишиг болгон ногдол ашиг тараах хэрэгтэй гэж үзжээ.

-Харин эсэргүүцэгчдийн зүгээс манай улс саарал жагсаалтад орж, FATF-ийн анхаарлыг татаад байгаа үед дахин мөнгө тараах нь эрсдэлтэй гэж үзэж байна. Мөн тэтгэвэрийн зээлийг тэглээд удаагүй байгаа үед дахин ийм шийдвэр гаргах нь бүр ч эрсдэлтэй гэжээ.

+Тэгвэл нөгөө талын байр сууриас 1072 хувьцааны ногдол ашиг тараах нь Эрдэнэс таван толгой ХХК-ий хувьд орлогынх нь өчүүхэн хэсэг тул санаа зовох зүйл байхгүй. Тодруулбал, тус компанийн өнгөрсөн оны цэвэр ашиг болох 1 их наяд 30 тэрбум төгрөгийн ердөө 200 тэрбум төгрөг нь хувьцааны ногдол ашиг хэлбэрээр тараагдана гэсэн юм.

Дээр дурьдсанчлан өөр өөр байр сууриуд байгаа ч, хувьцааны ногдол ашгийг ирэх тавдугаар сараас тараахаар шийдвэрлэсэн. Тиймээс иргэн та хэдэн ширхэг хувьцаатай болон брокер деллерийн компанид данстай эсэхээ баталгаажуулахын тулд 158989 дугаарт регистрийн дугаараа мессежээр илгээж /Регистрийн дугаарын эхний хоёр үсгийг латинаар бичнэ/ мэдээлэл аваарай.

Мөн https://net.schcd.mn сайт руу нэвтэрч регистрийн дугаараа оруулан шалгах боломжтой.