"Facebook Dating" болзооны апп-ыг Европын холбоонд үйлчилгээнд нэвтрүүлэхийг хориглолоо
"Facebook" компанийн "Facebook Dating" нэртэй болзох үйлчилгээг Европын холбоо хоригложээ.
Зохицуулагчид тус платформ нь хэрэглэгчдийн хувийн нууцыг хангах тал дээр олон дутагдал байгаа учраас ийм шийдвэр гаргасан байна. Одоо "Facebook Dating"-ийн хөгжүүлэгчид Европын орнуудад тус үйлчилгээг нэвтрүүлэхийн тулд хэрэглэгчдийн мэдээллийг үнэхээр хамгаалж чадна гэдгээ батлах ёстой болж байна. "Facebook "компани тус үйлчилгээг Европт 2-р сарын 14 гэхэд нэвтрүүлэхээр төлөвлөж байсан аж.
"Facebook"-ийн болзооны үйлчилгээг нэвтрүүлэх эрхийг түдгэлзүүлэх саналыг Ирландын Мэдээллийг хамгаалах комисс буюу "DPC" гаргасан байна. "DPC"-ийн мэдээлж байгаагаар тус үйлчилгээг нэвтрүүлэх тал дээр "Facebook"-ийн удирдлагууд шаардлагатай бичиг баримтуудаа танилцуулаагүй юм байна.
"DPC"-ийн төлөөлөгч энэ талаар "Бидэнд шаардлагатай бичиг баримтыг тэд бүрдүүлж өгөөгүй. Тийм учраас тодорхойгүй хугацаагаар тус үйлчилгээг Европын орнуудад нэвтрүүлэхийг хориглосон болно" гэжээ.
"Facebook" компани энэ бүхний хариуд шаардлагатай бүх баримт бичгүүдийг яаралтай гаргах тал дээр анхаарч уг үйлчилгээг ЕХ-нд мөрдөж буй Дата хамгаалах ерөнхий дүрэм (GDPR) нийцэж байгааг шалгаж байгаа гэж мэдэгдэв.
“Facebook Dating"-ийг Европын зах зээлд гаргахад бэлэн болгохын тулд шаардлагатай бүх зүйлийг заасан хугацааны дотор хийхэд бид бэлэн байна. Хэрэглэгчийн мэдээллийг бүрэн хамгаалалттай болгохын тулд бид хийж чадах бүх зүйлээ хийх болно. Нөхцөл байдлыг маань ч Европын холбоо ойлгоно гэдэгт итгэлтэй байна" гэж тус компанийн албан ёсны төлөөлөгч хэлэв.
