Жилийн өмнө Өмнөд Солонгосын урлагийн салбарыг доргиосон хэргүүд ар араасаа гарч байсан билээ. 

К-поп “Bigbang” хамтлагийн Сынри, “Highlight” хамтлагийн дуучин Жун Жүн Ён нарын групп чатын мэдээлэл ил болж тус улсын Авилгатай тэмцэх, иргэдийн эрхийн комисс тэдгээрийг шалгаж байсан юм. Тус чатын гишүүд эмэгтэйчүүдтэй бэлгийн харилцаанд орж байгаа бичлэг нууцаар хийн хуваалцаж, зармийг нь цахим орчинд тарааж байсан хэрэг илэрсэн бөгөөд түүнээс улбаалан хууль хүчнийхэн үргэлжлүүлэн шалгалт хийсэн юм.

Үүний үндсэн дээр "Big Bang" хамтлагийн дуучин Cынри хууль бус эмсийн хүрээлэн, мөрийтэй тоглоом, гадаад валют солилцооны газар байгуулсан гэж сэжиглэгдэн саатуулагдсан юм. Түүний хэргийг удтал шалгасны эцэст Сөүлийн Төв прокурорын газар түүнд бусдын биеийг хүчээр үнэлүүлсэн, хууль бус мөрийтэй тоглоомын газар байгуулсан гэсэн 2 хэрэг тулгаж байгаа аж. 

Өдгөө 29 настай Cынригийн жинхэнэ нэр нь Ли Сэүн Хён бөгөөд К-попын хамгийн том оддын нэг байсан юм. Тэрбээр мөрдөн байцаалтын ажиллагаа явагдаж эхэлснээс 2 сарын дараа буюу өнгөрсөн оны 3-р сард урлагийн ертөнцөөс гарч байгаагаа зарласан билээ.

"Мөрдөн байцаалтын явцад олон нийт намайг үзэн ядаж, шүүмжилж, ард түмний дайсан мэтээр харьцаж байна. Гэхдээ миний эргэн тойрны хүмүүст надаас илүү хэцүү байгаа байх." гэж Cынри Инстаграм хуудсандаа бичжээ.