Ерөнхий сайд Борис Жонсон Брекситээс нэг цагийн өмнө иргэдэд хандан "шинэ эриний эхлэл" -ийг угтан үг хэлэхээр болжээ. 

Их Британи Европын холбооны эдийн засгийн эвсэлд ороод 47 жилийг өнгрүүлсэн бөгөөд өнөө орой тэрхүү холбоог бүрмөсөн таслах юм.

Тус улсын Засгийн газар энэхүү үйл явдлыг тохиолдуулан Дауннинг гудамжийг гэрлээр чимэглэж, парламентын талбайд олон тооны туг байрлуулж, гурван сая ширхэг "Brexit" гэсэн бичигтэй 50 пенсийн зоосыг эргэлтэд оруулах ажээ.

Борис Жонсон бүхэл үдшийн турш Дауннинг гудамжинд байрлаж, харин "Brexit" намын удирдагч Найжел Фараж парламентын талбай дээр ард иргэдтэй цуг байх гэнэ. Харамсалтай нь өнөөг хүртэл засвартай байгаа Биг Бен цамхаг 23:00 цагт хонхоо дуугаргахгүй аж. 

Харин Брюссель хотод байрлах Европын холбооны төв байран дахь Их Британийн далбааг буулгах бөгөөд түүнийг Холбооны музейд байрлуулах юм байна. 

Ерөнхий сайд Борис Жонсон "Миний үүрэг бол энэ улсыг ирээдүй рүү хөтлөх. Өнөө орой бид бүхэн шинэ зүйлийн эхлэлийг тавьж байгаагаа санах хэрэгтэй. Одоо бидэнд өөрсдийн улс үндэстэнг өөрчлөх цаг ирсэн. Энэ шинэ эринд та өөрөө юм уу танай гэр бүл энэ орны аль хэсэгт төрсөн байх нь чухал биш. Бид бүгд нэгдэж чадвал хийж чадахгүй зүйл гэж байхгүй болно" гэж хэлсэн байна. 

Борис Жонсон өнгөрсөн оны 10-р сард энэхүү хуулийн төслийн батлуулж 2020 оноос өмнө улсаа Европын холбооноос гаргахыг оролдож байсан билээ. 

Харамсалтай нь парламентын гишүүд шинэчлэгдсэн гэрээг нягтлах цаг зав олдоогүй гэцгээн Ерөнхий сайдыг гурав дахь удаагаа "Brexit"-ийг хойшлуулахыг шаардаж, хэлэлцээр хийхгүй байхыг хүссэн юм. 

Тухайн үед Борис Жонсоны Тори намын эсрэг хүчин болох Хөдөлмөрийн нам парламентад олонх байсан бөгөөд тус намын гишүүд "Brexit"-ийн эсрэг байр суурь баримталдаг аж. 

Харин 2019 оны 12-р сарын 12-нд парламентын сонгууль болж Торичууд олонх болсон. Тэд энэ боломжийг алдалгүй 2020 он гармагц "Brexit"-ийн хууль баталж чадсан билээ.