Хятад улсад коронавирус хүчээ авч, одоогоор 100 гаруй хүн амиа алдаад байна. Энэ вирус анх гарсан мужийг бараг тэр чигээр нь хааж, явах гэсэн хүмүүсийг нисэх буудал дээр сайтар шалгаж хянаж байгаа юм. Гэтэл гай зовлон гэж хүлээсэн газраас биш харин хаа нэгтэй өөр зүгээс ирдэг гэдэг хоосон үг биш бололтой. Учир нь Хятад улсаас дэлхийн бусад улс орон луу чиглэсэн хэдэн мянга, саяар тоологдох илгээмж тардаг билээ.

Шинэ коронавирус Хятадаас хальж Тайланд, Япон, АНУ, Хонконг, Макао, Австрали... гээд хаа сайгүй тархаж байна. Улс болгоны нисэх буудал дээр өвдөж, халуурсан хүнийг олж илрүүлэх тусгай багууд ажиллах боловч харин илгээмжийг ингэж хянах боломж алга.

Хэдийгээр олон хүмүүс иймэрхүү зүйлээс нэлээд болгоомжилж байгаа боловч "AliExpress " нь энэ вирус илгээмжээр дамжин халдварлахгүй гэж мэдэгдэж байгаа юм.

Тус компанийн төлөөлөгчийн хэлснээр бол Хятадаас гарах илгээмж ойролцоогоор 10-30 хоног онгоцоор, усан онгоц, машинаар явж хүрэх газраа хүрдэг байна. Мөн "AliExpress" улс орнуудын эрүүл мэндийн байгууллагуудтай хамтарч хяналт тавин, тэдгээрийн тавих бүх шаардлагыг биелүүлэхэд бэлэн байгаа гэнэ.

Ийм янз бүрийн арга хэмжээ авсан байлаа ч коронавирусын тархалтаас болж "AliExpress", Alibaba Group-ын орлого эрс багасах төлөвтэй гэж шинжээчид үзэж байна. Учир нь бараа бүтээгдэхүүний чанарт биш харин аймшигт вирус “галзуурч” байгаа улс орноос янз бүрийн илгээмж авахыг хүсэх хүн цөөхөн байх бололтой гэсэн таавраас ийм дүгнэлтэд хүрсэн байна.