Мөн Коронавирусийн халдвар цагаан сарын баяртай зэрэгцэн гарч эхэлсэн нь бизнес эрхлэгчдэд томоохон цохилт болоод байгаа юм. Учир нь цагаан сар нь хятад иргэдийн хувьд хамгийн урт амралт болдог бөгөөд энэ үеэр тэд жилийн хамгийн их худалдан авалтаа хийж үйлчилгээний газруудаар хэсдэг аж. Харамсалтай нь энэ жилийн хувьд халдварт өвчнөөс болоод ихэнх томоохон хотууд хорио цээрийн дэглэмд орсон тул худалдаа, үйлчилгээ эрхлэгчид олон тэрбум ам.долларын алдагдал хүлээхдээ тулаад байгаа аж. 

Хятадыг сангийн яам коронавирусын эсрэг тэмцэх ажилд нийтдээ 11.2 тэрбум юань буюу 1.6 тэрбум ам.долларын төсөв баталсан билээ. Энэ нь Монгол улсын  нэг улирлын экспорттой тэнцэх хэмжээний мөнгө юм.
Энэ мөнгөөр тус улс шинээр 1600 хүний багтаамжтай 4 эмнэлэг байгуулж байгаагийн дээр хамгийн боловсронгуй эмнэлгийн төхөөрөмжүүдийг худалдан авч байгаа юм байна.

Хот суурин хоорондын хөдөлгөөнийг хязгаарласны улмаас томоохон хотуудад хүyсний хомстолд үүсээд эхэлсэн. Ухань, Бээжин, Шанхай зэрэг хотуудад зарим зах дэлгүүрүүдийн лангуу хоосон үзэгдэх нь элбэг тохиолдол болжээ. Үүний уршгаар өргөн хэрэглээний бараа бүтээгдэхүүний үнэ огцом нэмэгдэж эхэлсэн байна. Энэ янзаараа 15 сая хүртэлх иргэд өлсгөлөнд нэрвэгдэх аюултай байгааг олон улсын шинжээчид анхааруулсан билээ. 

Мөн Хятадын зах зээл дээр газрын тос, байгалийн хий, нүүрс гэх мэт эрчим хүчний түүхий эдийн үнэ 4 хувиар буурах төлөвтэй байна хэмээн Дэлхийн банкны тайланд дурджээ. 

Хэдийгээр Хятадын засгийн газар өвчний тархалтыг бууруулахын тулд дорвитой арга хэмжээ авч байгаа нь сайшаалтай  ч коронавирусээс болж үүсээд байгаа хөл хорио удаан үргэлжилбэл Хятад төдийгүй манай улсын эдийн засагт багагүй хохирол учруулах нь дамжиггүй юм. Ялангуяа Хятадын түүхий эдийн салбар доголдож эхэлбэл манай улсын эдийн засагт асар том цохилт болох билээ.