Трампын засаг захиргаа жирэмсэн эмэгтэйчүүдэд виз олгох явдлыг хязгаарлах зорилгоор шинэ хязгаарлалт хийхээр болжээ.
Жил бүр хэдэн арван мянган эмэгтэйчүүд эмэгтэйчүүд АНУ-д хүүхдээ төрүүлэхээр зорчдог бөгөөд ингэснээр үр хүүхдүүд нь АНУ-ын паспорттай болдог юм байна.
Төрийн департамент шинэчилсэн журмыг баасан гаригт нийтэд зарлахаар төлөвлөсөн гэж мэдэгдсэн бөгөөд нэрээ нууцалсан эх сурвалж энэ талаар Ассошиэйтед Пресс агентлагт мэдээлсэн аж. Шинэ журмаар бол жирэмсэн эмэгтэйчүүд жуулчны визээр АНУ-д зорчихын тулд асар өндөр шалгуурыг давах хэрэгтэй болох юм.
Трампын засаг захиргаа цагаачлалын бүх хэлбэрийг хязгаарлаж байгаа бөгөөд Дональд өөрөө "төрдөг жуулчид-ын асуудал дээр маш их санаа зовж байгаагаа удаа дараа илэрхийлсэн байна. АНУ-д төрсөн хэн ч Үндсэн хуульд заасны дагуу тус улсын иргэн гэж тооцогддог. Тэрбээр энэ хуулийг эсэргүүцэж, үүнийг дуусгавар болно гэж сүрдүүлсэн боловч хууль тогтоогчид, парламентын гишүүд нөхцөл байдал тийм ч амар биш гэж хэлжээ.
Жирэмсэн эмэгтэйчүүдэд зориулсан жуулчны визийг зохицуулах нь уг асуудлыг шийдэх нэг арга зам боловч албаны хүмүүс 1-3 сартай бие давхар эмэгтэйчүүдийг бусдаас нь хэрхэн ялгах вэ гэсэн асуудлыг дэвшүүлжээ. Энэ талаар визний алба ямар нэг мэдэгдэл хийгээгүй байна.
Консулын ажилтнууд визийн ярилцлагын үеэр эмэгтэй жирэмсэн эсэхийг асуух ёсгүй. Гэхдээ тэд виз мэдүүлэгчид АНУ-д хамгийн түрүүнд хүүхэд төрүүлэхээр зорчих гэж байгааг нь тодорхойлох шаардлагатай болох аж.
"Төрдөг жуулчлал" нь маш ашигтай бизнес юм. Америкийн олон компаниуд дунджаар 80,000 ам.долларын төлбөр авч жирэмсэн эмэгтэйчүүдийг АНУ-д жуулчны визээр нэвтрэхэд нь тусламж үйлчилгээ үзүүлдэг гэнэ. АНУ-д хүүхэд төрүүлэхээр Орос, Хятадын иргэд хамгийн их зорчдог юм.
