Д.Энхзул: Харааны шилийг тогтмол зүүх эсэх нь нүдний үндсэн харах чадал хэд байхаас шалтгаална
Долоо хоног бүрийн даваа, лхагва, баасан гаригт та бүхэнд хүрдэг "Саак өнцөг" булангийн ээлжит дугаар хүрч байна. Бид энэ удаагийн дугаараар харааны шилийг тогтмол зүүх ёстой юу, эсвэл ном унших, хичээл хийх зэрэг зөвхөн шаардлагатай үедээ зүүх ёстой юу? гэдэг талаар сурвалжиллаа. Зарим хүмүүс харааны шилийг байнга зүүснээр хараа тогтоно гэж үздэг бол зарим нь зөвхөн шаардлагатай үед л зүүх ёстой гэж боддог. Энэ нь иргэдийн дунд нэгдсэн, зөв ойлголт байхгүйн илрэл юм. Тэгвэл "Саак өнцөг" булангаар маргаантай ойлголтын "зөв өнцгийг" гаргаж ирэхийг зорьлоо.
Бид энэ талаар Улсын Нэгдүгээр Төв Эмнэлгийн нүдний эмч Д.Энхзултай ярилцсан юм.
-Харааны шилний талаар хүмүүсийн дундах нийтлэг буруу ойлголт байдаг уу?
-Ихэнх хүмүүс харааны шилний хэмжээ бага байх тусам хараа сайн, харин их байх тусмаа хараа муутай гэж ойлгодог. Гэтэл бодит байдал дээр -4 хэмжээтэй шил зүүдэг атлаа шилгүйгээр 50-60% хардаг хүн байхад, -0,75 хэмжээтэй шил зүүдэг хэрнээ шилгүйгээр 20-30% хардаг хүмүүс ч байдаг. Энэ нь нүдний шилний хэмжээнд биш, тухайн хүний нүднийх нь уг үндсэн харах чадал хэд байх нь маш чухал гэсэн үг юм. Чухам үүнээс л харааны шилийг тогтмол зүүх эсэх нь хамаарна.
1 Насанд хүрэгчдийн хувьд
-Тэгвэл харааны шилийг ямар хүмүүс тогтмол зүүх ёстой вэ?
-Жишээ нь, чиний хувьд шилгүйгээр 20-30% хараад, -1 хэмжээтэй шилээр 100% хардаг байж болно. Энэ тохиолдолд харааны шилийг тогтмол зүүх ёстой. Яагаад гэвэл үндсэн суурь хараа нь 20-30%, харааны шилээр 70-80% засагдаж байгаа учраас байнга зүүх нь зөв.
Харин шилгүйгээр 70-80% хараад, -1 хэмжээтэй шилээр үлдсэн 20-30% нь засагдаж байгаа бол бичиг цаасны ажил хийх үедээ хэрэглээ журмаар зүүх нь зүйтэй.
2 Хүүхдийн хувьд
-Тэгвэл хүүхдийн хувьд ч адилхан байдаг уу?
-Хэрвээ эмч хүүхдэд харааны шил зүүхийг зөвлөсөн бол харааны чадал хэд байхаас үл шалтгаалж тогтмол зүүх ёстой. Мөн хүүхэд угаас өсөж, хөгжиж байгаа учраас өсөх тусам нүдний дагуух тэнхлэг уртсаж, хараа мууддаг. Үүнийгээ дагаад харааны шилийг солих шаардлага гардаг. Тиймээс хүүхдийн хувьд зургаан сар тутамд хараагаа шалгуулах хэрэгтэй.
3
-Харааны шил олон жил зүүсэн ч хараа тогтоогүй, улам муудсан гэж хэлдэг хүмүүс байдаг. Энэ талаар?
-Эмч нарын зүгээс мэдээж шил зүүх нь хараанд тустай гэж зөвлөж байгаа. Харин иргэд харааны шилийг зүүхийн хажуугаар эрүүл ахуйн дэглэм баримтлалгүй утас, компьютер ширтэж, бүдэг орчинд ном уншин хараагаа улам муутгах нь түгээмэл байдаг. Энэ нь харааны шилний ач тусыг бууруулдаг.
-Тэгвэл хараагаа муудахаас сэргийлэхийн тулд яах ёстой вэ?
-Удаан хугацаагаар бичиг цаасны ажил хийх үедээ гэрэлтүүлэг сайтай орчинд эсвэл ширээний гэрэл ашиглах хэрэгтэй. Мөн харанхуйд утас, компьютер ширтэхээс зайлсхийх ёстой. Энэ мэтчилэн эрүүл ахуйн дэглэм сайтар баримталбал хараа тогтох болно.
Х.Үүрийнтуяа
Эх сурвалж дурдахгүйгээр зөвшөөрөлгүй хуулбарлан нийтлэхийг хориглоно.
